בריוון צו די מערכת

בסוד ישרים ועדה

צו די חשוב'ע רעדאקציע פון די גליון 'השגחה פרטית'! איך וויל אויסדריקן מיין טיפסטע דאנק און הכרת הטוב פאר אייער געהויבענע ארבעט, ווי איר טוט אזוי געניטליך מחזק זיין אן א שיעור אידישע קינדער.

אייערע יסודות'דיגע, אינהאלטסרייכע גליונות און שיעורים זענען ווי א טעגליכע 'גייסטישע אקסיגען' פאר מיר און פאר מיין גאנצע משפחה. עס בלאזט אריין אין אונזער היים א גייסט פון רואיגקייט, צופרידנקייט און אינערליכע שלוות הנפש.

מיט אייער ערלויבעניש וויל איך דא מיטטיילן מיט די ליינער אפאר ווערטער פון חיזוק אין אמונה ובטחון; ווערטער וואס זענען געווארן אסאך קלארער און מער ליכטיג ביי מיר – בלויז א דאנק אייערע גליונות, וואס איך טוה שטענדיג דורכלערן.

אסאך מאל מאכט זיך אז א מענטש גייט דורך א געוויסע נסיון אדער שוועריגקייט, און דאס ווארפט אים אריין אין כעס, אנגסט און פארצויגענע דאגות. אנדערש איז אבער א מענטש וואס טוט גרונטליך דורכטון די נושא פון אמונה ובטחון; אזא איינער געוואוינט זיך איין צו זען יעדע געשעעניש מיט 'רויזע ברילן', ווייל ער לערנט זיך אויס צו טרעפן די באהאלטענע חסדים און גוטס וואס ליגט אין יעדע סיטואציע.

ווען א מענטש איז געוואוינט זיך צו כסדר איינ'חזר'ן דעם כלל אז "הוא לבדו עשה ועושה ויעשה לכל המעשים", אזוי אויך צו פארשטיין אז ס'האט בכלל נישט קיין זינען צו טראגן א הארץ אויף אנדערע מענטשן, וויבאלד א בשר ודם איז סך הכל א שליח פון אויבן – טוישט דאס די גאנצע בליק וואס ער האט אויפן לעבן.

נאכן אייננעמען אט דעם טויש פון בליק, ברענגט דאס צו אז אנשטאט די אלע באגריפן פון 'אמונה' און 'בטחון' זאלן נאר זיין טעארעטישע ידיעות, ווערן זיי 'לעבעדיג'! די אמונה ווערט אקטועל און זאכליך, ס׳דרינגט אריין טיף אין הארץ און ס'האלט עס בארואיגן, ס'לאזט נישט צו קיין כעס אדער פארריבל, און ס'מאכט אז מ'זאל אננעמען אלע נסיונות פון לעבן מיט א פולשטענדיגע הכנעה און זיכערקייט אז אלעס וואס פאסירט – איז קלאר אויסגערעכנט פאר אונזער טובה.

און נאכאמאל; א גרויסן יישר כח פארן פארשפרייטן אזא אור פון אמונה אין כלל ישראל, און פארן אונז דערמאנען יעדן טאג אז מיר האבן א ליבער טאטע אין הימל!

מיט גרויס שעצונג און בברכת התורה – שלמה יצחק ראבינאוויטש, ירושלים