שבח דא שירתא

עֶס שְׁטֵייט אִין סֵפֶר לִקּוּטֵי תּוֹרָה (להאריז"ל פרשת עקב): אַזוֹי וִוי דֶער מֶענְטְשׁ אִיז בַּאשַׁאפְן גֶעװָארְן מִיט אַ גּוּף אוּן אַ נֶפֶשׁ, אַזוֹי זֶענֶען אוֹיךְ אַלֶע זַאכְן. אוּן אָט, דִי תּוֹרָה אַלֵיין הָאט אַ גּוּף אוּן אַ נֶפֶשׁ, דֶער גּוּף אִיז אַזוֹי וִוי אַ לְבוּשׁ, װָאס װֶערְט דֶערְמַאנְט אִין דִי װֶוערְטֶער פוּן חֲזַ"ל "גּוּפֵי תּוֹרָה", אוּן זִי הָאט דִי פְּנִימִיּוּת הַתּוֹרָה, װָאס דָאס אִיז דִי נְשָׁמָה. דֶערִיבֶּער הָאבְּן דִי מַלְאָכִים גֶעזָאגְט "תְּנָה הוֹדְךָ עַל הַשָּׁמָיִם", גֶעבּ דַיין שֵׁיינְקַייט, דִי תּוֹרָה, פַאר דִי װָאס זֶענֶען אִין הִימְל, װַאיל װָאס הָאבְּן זֵיי דֶען מִיט דֶער גּוּף הַתּוֹרָה, װִיבַּאלְד עֶס אִיז נִישְׁטָא צְװִישְׁן זֵיי קַיין קִנְאָה אוּן שִׂנְאָה, אוֹיךְ אִיז נִישְׁט שַׁיָּיךְ בַּיי זֵיי "לֹא תִּרְצָח", דוּ זָאלְסְט נִישְׁט הַרְגֶ'נֶען, וְכַדוֹמֶה, נָאר זֵיי הָאבְּן גֶעבֶּעטְן בְּלוֹיז דִי פְּנִימִיּוּת, װָאס אִיז נִישְׁט נִתְלַבֵּשׁ גֶעװָארְן אִין דֶעם גּוּף אוּן אִין דִי דִּינִים קֵיינְמָאל, װַאיל װִיבַּאלְד עֶס אִיז לְמַעְלָה דַארְף עֶס נִישְׁט נִתְלַבֵּשׁ װֶוערְן.

אוּן אַזוֹי וִוי דִי נְשָׁמָה פוּנֶעם מֶענְטְשׁ װָאס דַארְף נִתְלַבֵּשׁ װֶוערְן אִינֶעם גּוּף פוּן חֹמֶר, כְּדֵי אַרָאפְּצוּקוּמֶען אוֹיף דֶער װֶועלְט, אַזוֹי אִיז עֶס מִיט דִי תּוֹרָה.

אוֹיךְ אַ מִצְוָה הָאט אַ גּוּף, װָאס דָאס אִיז דִי בְּחִינָה פוּן מַעֲשֶׂה, אוּן זִי הָאט אַ נְשָׁמָה, דָאס אִיז דִי כַּוָּנָה װָאס דֶער מֶענְטְשׁ הָאט אִינְזִינֶען דֶערְבַּיי, עֶס צוּ טוּן אַזוֹי וִוי עֶס דַארְף צוּ זַיין.

(שערי זהר, שער שלישי, פרק ג')