אִין זֶרַע קוֹדֶשׁ (אנפאנג פרשת שלח) וֶוערְט בְּרֵייט אַרוּמְגֶערֶעדְט אִיבֶּער דֶער מַעֲלָה פוּן עֲנָוָה וָואס אֶרֶץ יִשְׂרָאֵל פַארְמָאגְט. עֶר שְׁרֵייבְּט אַז דֶער טֶבַע פוּן דֶער לַאנְד אִיז אַז אַלֶע וָואס וואוֹינֶען דָארְטְן, פִירְן זִיךְ מִיט הַכְנָעָה אוּן מִיט עֲנָוָה, אוּן אֲפִלּוּ עֶס אִיז דָא דָארְטְן גְרוֹיסֶע הוֹיכֶע שְׁטֶעט אוּן בֶּערְג, נָאכְאַלְס הָאט מֶען דָאס גֶערוּפְן כְּנָעַן' וָואס דָאס אִיז מִלְשׁוֹן הַכְנָעָה' וִויבַּאלְד דֶער לַאנְד אוּן דִי טֶבַע פוּן אַלֶע וָואס וואוֹינֶען אִין אִיר פִירְן זִיךְ אוֹיף מִיט הַכְנָעָה.
עֶר אִיז מַסְבִּיר מִיט דֶעם, אַז דָאס הָאט מֹשֶׁה רַבֵּנוּ אָנְגֶעזָאגְט פַאר דִי מְרַגְלִים, גֵייטְס קוּקְן וִוי אַזוֹי דִי מֶענְטְשֶׁען אִין יֶענֶער לַאנְד פִירְן זִיךְ אוֹיף מִיט אַ זֶעלְטֶענֶע הַכְנָעָה אוּן בְּטוּל, וּרְאִיתֶם אֶת הָאָרֶץ קוּקְט אָן דִי לַאנְד וִוי זֵיי פִירְן זִיךְ אוֹיף מַה הוּא מִיט אַ פַּשְׁטוּת אוּן עֲנָוָה. הֶחָזָק הוּא כָאטְשׁ וָואס זֵיי זֶענֶען שְׁטַארְקֶער מֶענְטְשֶׁען פִירְן זֵיי זִיךְ הֲרָפֶה וֵוייעכֶע צוּגֶעלָאזֶענֶע מֶענְטְשֶׁען, אוּן זֵיי הַאלְטְן זִיךְ נִישְׁט גְרוֹיס מִיט זֵייעֶר גְּבוּרָה. הַמְעַט הוּא אִם רָב אֲפִלּוּ זֵיי זֶענֶען אַסַאךְ, הַאלְטְן זֵיי זִיךְ וֵויינִיג, הֲיֵשׁ בָּהּ עֵץ אִם אַיִן קוּקְטְס וִוי עֶס אִיז דָא דָארְטְן כָּשֵׁרֶ'ע און וואוֹילֶע מֶענְטְשֶׁען וָואס מַאכְן פוּן זִיךְ אַיִן' – וִוי גָארְנִישְׁט, זֵיי הַאלְטְן זִיךְ קְלֵיין.
מֶען קֶען צוּלֵייגְן נָאךְ אַ גֶעדַאנְק צוּם דֶעם פְשַׁט אַז כְּנַעַ"ן אִיז אַ לָשׁוֹן פוּן הַכְנָעָה, לוֹיט וִוי סְ'שְׁטֵייט אִין דְּרָשׁוֹת חֲתַם סוֹפֵר (שבת שובה דרוש א ד"ה ולכן) אַז כְּנַעַן אִיז רָאשֵׁי תֵּבוֹת כִּנּוֹר נָ'עִים עִים נָ'בֶל, וָואס דָאס מֵיינְט, דֶער זִיסֶע קוֹל וָואס קוּמְט אַרויס פון אַ פִידְל. וָואסְפָארָא שַׁיָּכוּת הָאט אַ פִידְל מִיט כְּנַעַן, מֶען קֶען אֶפְשָׁר זָאגְן אַז דֶער צוּשְׁטֶעל אִיז אַז בֵּיידֶע וַוייזְן דִי מִדָּה פוּן הַכְנָעָה, בַּאזִירְט אוֹיף דֶעם וָואס דֶער חוֹזֶה מִלּוּבְּלִין זי"ע אִיז מַסְבִּיר דֶעם פָּסוּק (מלכים ב ג טו) וְהָיָה כְּנַגֵן הַמְנַגֵן וַתְּהִי עָלָיו יַד ה" וֶוען אַ מֶענְטְשׁ שְׁפִּילְט שֵׁיין אוֹיף אַ פִידְל, קֶען אַרֵיינְקוּמֶען אַ מַחֲשָׁבָה פוּן גַּאֲוָה' אִין דֶער מֶענְטְשׁ, "אִיךְ קֶען שֵׁיין שְׁפִּילְן" "אִיךְ בֵּין גָאר טָאלָאנְטְפוּל" אא"ו, אָבֶּער דֶער עֶצֶם פִידְל קֶען נִישְׁט הָאבְּן אַזֶעלְכֶע מַחֲשָׁבוֹת, וִוייל אַ פִידְל אִיז אַ דּוֹמֵם, עֶס הָאט נִישְׁט קֵיין שׁוּם חַיּוּת. זָאגְט דֶער חוֹזֶה אַז דָאס קוּמְט דָא דֶער פָּסוּק בַּאוָוארֶענֶען, וְהָיָה כְּנַתֵּן וֶוען דֶער שְׁפִּילֶער טְרַאכְט נִישְׁט פוּן זִיךְ, נָאר עֶר אִיז פּוּנְקְט וִוי דֶער הַמְנַגֵן דֶער פִידְל, דֶעמָאלְט אִיז עֶר זוֹכֶה אַז וַתְּהִי עָלָיו יַד ה'.
מֶען קֶען אֶפְשָׁר זָאגְן בְּדֶרֶךְ רֶמֶז אַז דָאס לִיגְט אִין דֶער רָאשֵׁי תֵּבוֹת פוּן כְּנַעַ"ן כִּנּוֹר נָעִים עִים נָ'בֶל, מֶען דַארְף זִיךְ הַאלְטְן בְּהַכְנָעָה אוּן קְלֵיין, אַזוֹי וִוי דֶער פִידְל. אוּן דָאס קוּמְט צוּ וַוייזְן אַז דֶער טַעֲנָה אויף דִי מְרַגְלִים אִיז גֶעוֶוען, אַז זֵיי הָאבְּן נִישְׁט גֶעהַאט דֶעם אֱמֶתֶ'ע הַכְנָעָה אוּן עֲנָוָה. וֶוען זֵיי הָאבְּן גֶעקוּקְט אוֹיף דִי רִיזְן, וָואלְטְן זֵיי גֶעדַארְפָט אַרֵיין קוּקְן אוּן זֶען וִוי אַזוֹי מֶען דַארְף לֶעבְּן מִיט אַ פַּשְׁטוּת אוּן מִיט אַ בְּטוּל, אוּן נִישְׁט חָלִילָה מִיט אַ יִאוּשׁ אוּן מִיט אַ שְׁלֶעכְטְן בְּלִיק אוֹיף דִי לַאנְד.
