אַ בְּרִיוו פוּנֶעם רֹאשׁ יְשִׁיבָה שְׁלִיטָ"א

פְּרֵיילִיךְ אִין סוּכָּה, פְּרֵיילִיךְ אִין שְׁטוּב

בְּעֶזְרַת ה' יִתְבָּרַךְ
יוֹם ה' פָּרָשַׁת וְזֹאת הַבְּרָכָה א', דְּרִיטֶע אוֹת פוּן שֵׁם הֲוָיָ"ה, י"ג תִּשְׁרֵי, שְׁנַת תשפ"ז לִפְרָט קָטָן

לְכָבוֹד ... נֵרוֹ יָאִיר

מִיר שְׁטֵייעֶן שׁוֹין עֶרֶב סוּכּוֹת, עֶס קוּמְט שׁוֹין דִי הֵיילִיגֶע יוֹם טוֹב סוּכּוֹת; יֶעדֶע מָאל דוּ גֵייסְט אַרַיין אִין דִי סוּכָּה זָאלְסְטוּ אַיינְלַאדֶענֶען דִי הֵיילִיגֶע אוּשְׁפִּיזִין, דִי הֵיילִיגֶע גֶעסְט. עֶס שְׁטֵייט אִין זוֹהַר (פָּרָשַׁת אֱמוֹר, קד.) אַז דִי אוּשְׁפִּיזִין קוּמֶען נָאר אַז מֶען רוּפְט זֵיי; זָאלְסְטוּ זָאגְן: "אַזְמִין לִסְעוּדָתִי", אִיךְ לַיידְן עֶנְק אַיין צוּ קוּמֶען צוּ מִיר אִין דִי סוּכָּה, "אוּשְׁפִּיזִין עִילָאִין", דִי הֵיילִיגֶע גֶעסְט, "אַבְרָהָם יִצְחָק יַעֲקֹב מֹשֶׁה אַהֲרֹן יוֹסֵף וְדָוִד", אוּן זָאלְסְט אַכְטוּנְג גֶעבְן זֵיי זָאלְן נִישְׁט אַנְטְלוֹיפְן פוּן דַיין סוּכָּה, זָאלְסְט זִיךְ נִישְׁט אוֹיפְרֶעגְן אוֹיף דַיין וַוייב אוּן קִינְדֶער, אוּן אַז דִי סוּכָּה אִיז קְלֵיין, מֶען זִיצְט צַאמְגֶעשְׁטוּפְּט אוּן עֶס גִיסְט זִיךְ אוּן עֶס טוּט זִיךְ - זָאלְסְטוּ בְּלַייבְן פְּרֵיילִיךְ, עֶס זָאל דִיר גָארְנִישְׁט אָנְגֵיין, גֶעדענְק וֶוער עֶס זִיצְט נֶעבְן דִיר, גֶעדענְק אַז דִי הֵיילִיגֶע גֶעסְט זֶענֶען דָא, אוּן אִיךְ בִּין זִיכֶער אַז וֶוען דוּ וָואלְסְט גֶעהַאט בַּיי דִיר אִין סוּכָּה דַיין רַב אָדֶער דַיין דַּיָּן - וָואלְסְטוּ גֶעזִיצְן אוּן גֶעשְׁמֵייכְלְט, אוּן אֲפִילוּ דִי קִינְדֶער טַאנְצְן אוּן שְׁפְּרִינְגֶען, עֶס גִיסְט זִיךְ אוּן עֶס טוּט זִיךְ וְכוּ' - וָואלְסְטוּ נִישְׁט גֶעשְׁרִיגְן.

קֵיינְמָאל זָאלְסְטוּ נִישְׁט וַואַרְפְן אַ זַאךְ פוּן כַּעַס, אָדֶער צֶעבְּרֶעכְן אַ זַאךְ פוּן כַּעַס, שְׁטֵייט אִין זֹהַר (פָּרָשַׁת פְּקוּדֵי רסג:) אוֹיב אַ מֶענְטְשׁ - וֶוען עֶר רֶעגְט זִיךְ אוֹיף - וַואַרְפְט עֶר אַ זַאךְ אָדֶער עֶר צֶעבְּרֶעכְט אַ זַאךְ - זֶענֶען דָא מַלְאָכִים סְפֶּעצִיֶעל גֶעשְׁטֶעלְט פַאר דֶעם, זֵיי נֶעמֶען דִי זַאךְ וָואס דֶער מֶענְטְשׁ הָאט גֶעוָואַרְפְן אוּן זֵיי בְּרֶענְגֶען דָאס אִין הִימְל פַארְן אֵייבֶּערְשְׁטְן אוּן זָאגְן: "קוּקְט, דֶער מֶענְטְשׁ הָאט גֶעבְּרֶענְגְט אַ קָרְבָּן פַאר עֲבוֹדָה זָרָה", אוּן דִי הֵיילִיגֶע חֲכָמִים זָאגְן (שַׁבָּת קה:): "כָּל הַכּוֹעֵס כְּאִלּוּ עוֹבֵד עֲבוֹדָה זָרָה", וֶוער עֶס אִיז בְּכַעַס אִיז אַזוֹי וִוי עֶר דִינְט עֲבוֹדָה זָרָה; זָאלְסְטוּ זִיךְ זֵייעֶר הִיטְן נִישְׁט צוּ וֶוערְן בְּכַעַס, נִישְׁט וַואַרְפְן קֵיין זַאכְן, נִישְׁט צֶעבְּרֶעכְן קֵיין זַאכְן; הָאב רַחֲמָנוּת אוֹיף דַיינֶע קִינְדֶער, וַוייל וֶוען טַאטֶע מַאמֶע זֶענֶען בְּכַעַס גֵייעֶן דִי קִינְדֶער צוּגְרוּנְד, דִי גַאנְצֶע שְׁטוּב וֶוערְט חָרוּב.

הַיינְטִיגֶע טֶעג דַארְף מֶען מֶער אַכְטוּנְג גֶעבְן עֶס זָאל זַיין פְּרֵיילִיךְ אִין שְׁטוּב, דִי קִינְדֶער זָאלְן לִיב הָאבְן צוּ זַיין אִין שְׁטוּב, דִי קִינְדֶער זָאלְן נִישְׁט וֶועלְן אַוֶועק גֵיין פוּן דִי אִידִישֶׁע וֶועג; וַוייל אַמָאל אִיז גֶעוֶוען נִסְיוֹנוֹת פוּן מַשְׂכִּילִים, מְחַקְרִים וְכוּ', הַיינְט אִיז נִישְׁטָא דִי נִסְיוֹנוֹת, הַיינְט אִיז דִי נִסָּיוֹן אַז מֶענְטְשְׁן וִוילְן לִיבְשַׁאפְט, מֶענְטְשְׁן וִוילְן וַואַרֶעמְקֵייט, אוּן אַז קִינְדֶער בַּאקוּמֶען דָאס נִישְׁט אִין שְׁטוּב - זוּכְן זֵיי דָאס בַּיי דִי אוּמוֹת הָעוֹלָם הַשֵׁם יִשְׁמְרֵינוּ; אוּן כָּל שֶׁכֵּן וֶוען מֶען טוּט מִצְווֹת, עֶס קוּמְט שַׁבָּת, עֶס קוּמְט אַ יוֹם טוֹב - מוּז מֶען דָאס מַאכְן מִיט שִׂמְחָה, מִיט לִיבְשַׁאפְט אוּן וַואַרֶעמְקֵייט, אַז דִי קִינְדֶער זָאלְן דָאס וֶועלְן, קִינְדֶער זָאלְן אַרוֹיסְקוּקְן אוּן פְּרֶעגְן: "וֶוען קוּמְט שׁוֹין יוֹם טוֹב? וֶוען קוּמֶען שׁוֹין דִי טֶעג וָואס עֶס גֵייט זַיין זֵייעֶר פְּרֵיילִיךְ אִין שְׁטוּב?" אַזוֹי וֶועלְן זֵיי דָאס אָנְהַאלְטְן זֵייעֶר גַאנְץ לֶעבְן.

דֶער אֵייבֶּערְשְׁטֶער זָאל הֶעלְפְן זָאלְסְטוּ הָאבְן הַצְלָחָה אִין אַלֶע עִנְיָנִים.

(עֲצָתוֹ אֱמוּנָה בְּרָכָה-א תשפ"ז)