שְׁאֵלוֹת וּתְשׁוּבוֹת בְּרֶסְלֶב
שְׁאֵלוֹת וּתְשׁוּבוֹת בְּרֶסְלֶב
פַארְוָואס הָאבּ אִיךְ גֶעשְׁרִיגְן?
שְׁאֵלָה:
לְכָבוֹד דֶער רֹאשׁ יְשִׁיבָה שְׁלִיטָ"א,
אִיךְ שְׁפִיר זִיךְ צוּ בַּאגְרָאבְּן פַאר בּוּשָׁה, אִיךְ הָאבּ פְרִיעֶר זִיךְ אוֹיפְגֶערֶעגְט אוּן גֶעשְׁרִיגְן אוֹיף מַיין וַוייבּ, וִוי אַזוֹי הָאבּ אִיךְ דָאס גֶעקֶענְט טוּן? אִיךְ בִּין אָנְגֶעפִילְט מִיט חֲרָטָה גֶעפִילְן, אוּן אִיךְ שֶׁעם זִיךְ פוּן מִיךְ אַלֵיין, וִוי אַזוֹי וֶועל אִיךְ קֶענֶען בַּאווַייזְן מַיין פָּנִים פַארְ'ן הֵיילִיגְן רֶבִּי'ן וֶוען אִיךְ קוּם צוּ אִים אִין אוּמַאן אִין קוֹים אַ וָואךְ אַרוּם?
בָּרוּךְ ה' אַז מַיין לֶעבְּן הָאט זִיךְ גֶעטוֹישְׁט צוּם גוּטְן, מַמָשׁ פוּן אֵיין עֶק צוּם אַנְדֶערְן, אָבֶּער נָאר וֶוען עֶס קוּמְט צוּ טֶעכְנִישֶׁע זַאכְן וָואס מֶען דַארְף טוּן, צוּ דַאוֶוענֶען, לֶערְנֶען, מִקְוֶה, הֲפָצָה, אוּן אַזוֹי וַוייטֶער; וֶוען וֶועל אִיךְ אָבֶּער שׁוֹין זוֹכֶה זַיין צוּ מֶער פְּנִימִיּוּת'דִיגֶע זַאכְן, זִיךְ נִישְׁט אוֹיפְצוּרֶעגְן, צוּ רֶעדְן שֵׁיין אִינְדֶערְהֵיים, צוּ טְרַאכְטְן נָאר גוּטֶע מַחֲשָׁבוֹת, אוּן דָאס גְלַייכְן?
יְיַשַׁר כֹּחַ
תְּשׁוּבָה:
בְּעֶזְרַת ה' יִתְבָּרַךְ
יוֹם ד' פָּרָשַׁת נִצָּבִים-וַיֵּלֶךְ, כ' אֱלוּל, שְׁנַת תשפ"ו לִפְרָט קָטָן
... נֵרוֹ יָאִיר
אִיךְ הָאבּ עֶרְהַאלְטְן דַּיין בְּרִיוו.
אוֹי וֵויי, וָואס אִיז מִיט דִיר, וִוי מֶעג זַיין אַזַא זַאךְ - מֶען זָאל שְׁרֵייעֶן אוֹיף אַ וַוייבּ? מוֹהֲרֹאשׁ זְכוּתוֹ יָגֵן עָלֵינוּ הָאט דֶערְצֵיילְט אַז דֶער צַדִּיק רֶבִּי אַבְרָהָם בֶּן רֶבִּי נַחְמָן הָאט אַמָאל גֶעהֶערְט וִוי אֵיינֶער שְׁרֵייט אוֹיף זַיין וַוייבּ, הָאט דֶער צַדִּיק אַפִיר גֶענוּמֶען דֶעם אִיד אוּן דִי זַייט אוּן אִים פָארְגֶעהַאלְטְן: "אוֹיף אַ וַוייבּ שְׁרֵייט מֶען?! צוּ אַ וַוייבּ דַארְף מֶען רֶעדְן וֵוייךְ, אֵיידְל אוּן שֵׁיין".
אִיךְ בֶּעט דִיר אוּן אִיךְ וָואָרְן דִיךְ, שְׁרֵיי נִישְׁט אִין שְׁטוּבּ, שְׁרֵיי נִישְׁט אוֹיף דַּיין וַוייבּ; אַז מֶען שְׁרֵייט אוֹיף דִי וַוייבּ, מֶען כַּעַס'ט זִיךְ - טְרַייבְּט מֶען אַרוֹיס דִי שְׁכִינָה פוּן שְׁטוּבּ. אַ בְּרֶסְלֶב'עֶר חָסִיד דַארְף רֶעדְן שֵׁיין צוּ דִי וַוייבּ, דֶער הֵיילִיגֶער רֶבִּי הָאט אוּנְז אוֹיף דֶעם זֵייעֶר גֶעוָוארְנְט (שִׂיחוֹת הָרַ"ן, סִימָן רסג), אַז מֶען דַארְף רַחֲמָנוּת הָאבְּן אוֹיף דִי וַוייבּ, מֶען דַארְף רֶעדְן שֵׁיין צוּ אִיר אוּן אִיר הַאלְטְן טֵייעֶר.
גֵיי הִתְבּוֹדְדוּת, דָאס וֶועט אַרוֹיסְנֶעמֶען אַלֶע נֶערְוֶוען פוּן דִיר. זוּךְ אַ וִוינְקְל וואוּ זִיךְ אוֹיסְצוּשְׁמוּעֶסְן דָאס הַארְץ מִיטְן אֵייבֶּערְשְׁטְן אוּן זָאג: "הֵיילִיגֶער בַּאשֶׁעפֶער אִיךְ דַארְף אַ יְשׁוּעָה, אִיךְ פַארְלִיר זִיךְ אִין שְׁטוּבּ אוֹיף מַיין וַוייבּ, הֵיילִיגֶער בַּאשֶׁעפֶער רַאטֶעוֶוע מִיךְ, הֶעלְף מִיר אִיךְ זָאל הָאבְּן אַ שְׁטַארְקֶע אֱמוּנָה, אִיךְ זָאל זִיךְ נִישְׁט פַארְלִירְן, אִיךְ זָאל וִויסְן אוּן גֶעדֶענְקֶען אַז דוּ בִּיסְט נֶעבְּן מִיר, דוּ בִּיסְט אִין שְׁטוּבּ אוּן דוּ זֶעסְט אַלֶעס וָואס אִיךְ טוּ, אוּן אוֹיךְ וֶוען זַאכְן גֵייעֶן נִישְׁט וִוי אִיךְ וִויל - זָאל אִיךְ הָאבְּן סַבְלָנוּת, זִיךְ נִישְׁט כַּעֲס'ן, הֶעלְף מִיר אִיךְ זָאל נִישְׁט נֶערְוֶוז וֶוערְן אוּן שְׁרֵייעֶן אוֹיף מַיין וַוייבּ"; אַזוֹי זָאלְסְטוּ בֶּעטְן אוּן בֶּעטְן דֶעם אֵייבֶּערְשְׁטְן, בִּיז דוּ וֶועסְט זִיךְ קֶענֶען אֵיינְהַאלְטְן עֶס זָאל נִישְׁט פַּאסִירְן אַזוֹינְס נָאכְאַמָאל.
דֶער אֵייבֶּערְשְׁטֶער זָאל הֶעלְפְן זָאלְסְטוּ הָאבְּן הַצְלָחָה אִין אַלֶע עִנְיָנִים.
אַ כְּתִיבָה וַחֲתִימָה טוֹבָה.
(עֲצָתוֹ אֱמוּנָה בְּרָכָה-א תשפ"ז)
