מזמורי תהלים
קכה
קכו
א שִׁיר הַמַּֽעֲלוֹת הַבֹּֽטְחִים בַּֽיְיָ כְּֽהַר־צִיּוֹן לֹא־יִמּ֗וֹט לְעוֹלָם יֵשֵֽׁב: ב יְֽרוּשָׁלִַם הָרִים סָבִיב לָה וַֽיְיָ סָבִיב לְעַמּוֹ מֵֽעַתָּה וְעַד־עוֹלָֽם: ג כִּי לֹא יָנוּח שֵׁבֶט הָרֶשַׁע עַל גּוֹרַל הַצַּדִּיקִים לְמַעַן לֹא־יִשְׁלְחוּ הַצַּדִּיקִים | בְּעַוְלָתָה יְדֵיהֶֽם: ד הֵיטִיבָה יְיָ לַטּוֹבִים וְלִֽישָׁרִים בְּלִבּוֹתָֽם: ה וְהַמַּטִּים עֲקַלְקַלּוֹתָם יֽוֹלִיכֵם יְיָ אֶת־פֹּֽעֲלֵי הָאָוֶן שָׁלוֹם עַל־יִשְׂרָאֵֽל:
א שִׁיר הַמַּֽעֲלוֹת בְּשׁוּב יְיָ אֶת־שִׁיבַת צִיּוֹן הָיִינוּ כְּחֹֽלְמִֽים: ב אָז יִמָּלֵא שְׂחוֹק פִּינו וּלְשׁוֹנֵנוּ רִנָּ֥ה אָז יֹֽאמְרוּ בַגּוֹיִם הִגְדִּיל יְי לַֽעֲשׂוֹת עִם־אֵֽלֶּה: ג הִגְדִּיל יְיָ לַֽעֲשׂוֹת עִמָּנו הָיִינוּ שְׂמֵחִֽים: ד שׁוּבָה יְיָ אֶת־שְׁבִיתֵנו כַּֽאֲפִיקִים בַּנֶּֽגֶב: ה הַזֹּֽרְעִים בְּדִמְעָה בְּרִנָּה יִקְצֹֽרוּ: ו הָלוֹךְ יֵלֵךְ | וּבָכֹה נֹשֵׂא מֶֽשֶׁךְ־הַזָּרַע בֹּא־יָבוֹא בְרִנָּה נֹשֵׂא אֲלֻמֹּתָֽיו:
