☆ פָּנָה אֶל תְּפִלַת הָעַרְעָר * בְּרֹאשׁ הַשָּׁנָה יָצָא יוֹסֵף מִבֵּית הָאֲסוּרִין * הוֹיפְט פוּנֶעם יָאר ☆ וּתְפִלָה.. מַעֲבִירִין אֶת רֹעַ הַגְּזֵרָה * מִן הַמֵצַר קְרָאתִי * יֶעדֶע תְּפִלָה שְׁפַאלְט הִימְלְן
פָּנָה אֶל תְּפִלַּת הָעַרְעֶר
אֵיינֶער פוּן דִי גָאר וִויכְטִיגֶע הוֹיפְטְן אִין רֹאשׁ הַשָּׁנָה אִיז 'תְּפִלָה'. אַזוֹי וִוי מְ'זָאגְט אִין דֶער פִּיּוּט פוּן וּנְתַנָּה תֹּקֶף 'וּתְשׁוּבָה וּתְפִלָּה וּצְדָקָה מַעֲבִירִין אֶת רֹעַ הַגְּזֵרָה' תְּפִלָה אִיז אֵיינֶער פוּן דִי זַאכְן וָואס צוּרֵייסְט אַלֶע שְׁלֶעכְטֶע גְזֵירוֹת, מִיט אֵיין תְּפִלָה קֶען מֶען רֵייסְן וֶועלְטְן אִין אִיבֶּערְדְרֵייעֶן שְׁוֶוערֶע גְזֵירוֹת.
אַ גַאנְץ יָאר, קֶען מֶען אַלֶעס פּוֹצְלִין מִיט תְּפִלָּה, יֶעדער תְּפִלָה וָואס אַ אִיךְ בֶּעט בֵּיים השי"ת, גֵייט אַרויף בִּיזְן כִּסֵּא הַכָּבוֹד, אוּן דֶער אֵייגֶערְשְׁטֶער הֶערְט אוֹיס גֶעדְן אֵיינְצִיגֶער תְּפִלָּה פוּן יֶעדן אִיד, כִּי קֵל שׁוֹמֵעַ תְּפִלּוֹת. אָבֶּער רֹאשׁ הַשָּׁנָה הָאט דֶער דַאוֶוענֶען אִינְגַאנְגֶען אַן אַנְדֶערֶע בַּאדִייט, אַ תְּפִלָּה אוּם רֹאשׁ הַשָּׁנָה אִיז אַסַאךְ הֶעכֶער וִוי אַ גַאנְץ יָאר. עֶס שְׁטֵייט אִין מִדְרָשׁ תְּהִלִים (קב ג) אוֹיף דִי פָּסוּק אִין תְּהִלִים (קב יח) פָּנָה אֶל תְּפִלַּת הָעַרְעָר וְלֹא בָּזָה אֶת תְּפִלָּתָם, אָמַר רַבִּי יִצְחָק כְּלַפֵי הַדּוֹרוֹת אָמְרוּ: דִי פָּסוּק אִיז גֶעזָאגְט גֶעוָוארְן פַאר דִי דּוֹרוֹת הֵיינְט צוּטָאגְס, שֶׁאֵין לָהֶם לֹא נָבִיא וְלֹא כֹּהֵן מוֹרֶה צֶדֶק וְלֹא בֵּית הַמִּקְדָּשׁ שֶׁכְּכַפֶר עֲלֵיהֶם וָואס מִיר הָאבְּן נִישְׁט קֵיין נָבִיא, נִישְׁט קֵיין כֹּהֵן, אוּן נִישְׁט קֵיין בֵּית הַמִּקְדָּשׁ וָואס מִיר זָאלְן קֶענֶען בְּרֶענְגֶען קָרְבָּנוֹת, אֶלָּא תְּפִלָּה אַחַת נִשְׁתַּיְרָה לָהֶן שֶׁהֵם מִתְפַּלְלִין בְּרֹאשׁ הַשָּׁנָה וּבַיּוֹם הַכִּפּוּרִים, אַל תִּבְזֶה אוֹתָם, מִיר זֶענֶען גֶעבְּלִיבְּן בְּלוֹיז מִיט דִי תְּפִלּוֹת פוּן דִי יָמִים נוֹרָאִים, אוּן אוֹיף דֶעם הָאט דָּוִד הַמֶּלֶךְ גֶעבֶּעטְן דֶער אֵייגֶערְשְׁטֶער אַל תִּבְזֶה אֶת תְּפִלָּתָם פַארְשֶׁעם נִישְׁט דִי תְּפִלּוֹת פוּן דִי הֵיילִיגֶע טֶעג, נָאר נֶעם אָן אַלֶע תְּפִלּוֹת וָואס כְּלַל יִשְׂרָאֵל דַאוֶוענְט אוּן בֶּעט זִיךְ אוֹיס אִין דִי טֶעג.
אוּן דִי מִדְרָשׁ דַּרְשְׁנְט וַוייטֶער אוֹיף דִי וַוייטֶערדִיגֶע פָּסוּק (שם יט) תִּכָּתֶב זאת לְדוֹר אַחֲרוֹן וְעַם נִבְרָא יְהַלָּל קָהּ, אֵלּוּ הַדּוֹרוֹת שֶׁחַיָּבִין בְּמַעֲשֵׂיהֶם הָרָעִים, וּבָאִין וְעוֹשִׂין תְּשׁוּבָה וּמִתְפַּלְלִין' לְפָנֶיךָ בְּרֹאשׁ הַשָּׁנָה וביוה"כ, וְכוּ' הקב"ה בּוֹרֵא אוֹתָם בְּרִיָּה חֲדָשָׁה אֲפִלּוּ מְ'אִיז אִין אַ מַצָּב וָואס מְ'אִיז לֵיידֶער אַרוּם גֶענוּמֶען מִיט אַסַאךְ עֲבֵירוֹת, קֶען מֶען דָאס אַלֶעס אָפְּרֵיינִיגְן אוּן זוֹכֶה זֵיין צוּ אַ גוּט גֶעבֶּענְטְשְׁטֶע יָאר דוּרְךְ תְּשׁוּבָה טון, אוּן דַאוֶוענֶען צוּם רִבּוֹנוֹ שֶׁל עוֹלָם.
בֶּאֱמֶת דַארְף מֶען פַארְשְׁטֵיין דֶער בַּאדִייט פוּן דִי מִדְרָשׁ, וָואס מֵיינְט דָאס 'תְּפִלָּה אַחַת' אַז עֶס אִיז בְּלוֹיז גֶעבְּלִיבְּן דִי תְּפִלּוֹת פוּן רֹאשׁ הַשָּׁנָה, אַ גַאנְץ יָאר קֶען מֶען דָאךְ פּוֹצְלִין אוּן אוֹיפְטוּן אַ גֶעוַואלְד מִיט תְּפִלָה, אִיז וָואס אִיז רֹאשׁ הַשָּׁנָה אַ שְׁטֶערְקֶער מַעֲלָה וִוי אַ גַאנְץ יָאר אַז דִי תְּפִלּוֹת גֵייעֶן גְלֵייךְ אַרויף.
עֲבוֹדָה מֵאֲבוֹתֵינוּ בְּמִצְרַיִם אוֹיף רֹאשׁ הַשָּׁנָה הָאבְּן דִי אִידְן אִין מִצְרַיִם אוֹיפְגֶעהֶערְט צוּ אַרְבֶּעטְן שְׁוֶוער, רֹאשׁ הַשָּׁנָה אִיז אַ טָאג פוּן פְרֵייהֵייט, מֶען גִייט אַרוֹיס פון 'זִיךְ', פון אַלֶע צָרוֹת און פון אַלֶע עֲבֵירוֹת, דֶערְפַאר וֶוייל דֶער טָאג אִין אַזוֹי דֶערְהוֹיבְּן, וֶוערְן דִי תְּפִלּוֹת אָנְגֶענוּמֶען, און דָאס מֵיינְט דִי מִדְרָשׁ תְּפִלָּה אַחַת' דָאס אִיז דִי הוֹיפְט פוּן דִי תְּפִלּוֹת פוּן אַ גַאנְץ יָאר, וֵוייל דֶער מֶענְטְשׁ שְׁטֵייט אִין אַסַאךְ אַ הֶעגֶערֶע מַדְרֵגָה.
בְּרֹאשׁ הַשָּׁנָה יָצָא יוֹסֵף מִבֵּית הָאֲסוּרִין
מֶען קֶען דָאס עֶרְקְלֶערְן לוֹיט וִוי דִי סְפָרִים זֶענֶען מַסְבִּיר אִיבֶּער דֶער גְרוֹיסְקֵייט פוּן דִי טָאג, רֹאשׁ הַשָּׁנָה וֶוערְט מֶען דֶערְהוֹיבְּן מֶער וִוי יֶעדְן טָאג אִין יָאר, עֶס אִיז אַזוֹי וִוי מְגֵייט אַרוֹיס אֵיין טָאג פון גָּלוּת, עֶס אִיז אַ הֶעגֶערֶע טָאג, אָנְגֶעפִילְט מִיט רוּחָנִיּוּת, רֹאשׁ הַשָּׁנָה אִיז דָא אַ גֶעוַואלְדִיגֶע עֵת רָצוֹן אוֹיבְן אִין הִימְל, צוּ קֶענֶען פּוֹעְלִין יְשׁוּעוֹת. דִי גְמָרָא (ראש השנה י:) זָאגְט בְּרֹאשׁ הַשָּׁנָה יֹצֵא יוֹסֵף מִבֵּית הָאֲסוּרִין יוֹסֵף הַצַדִּיק אִיז אַרוֹיס פון גֶעפֶענְגֶענִישׁ אוֹיף רֹאשׁ הַשָּׁנָה. דֶער שֵׁם מִשְׁמוּאֵל עֶרְקְלֶערְט אַז כְּלַל יִשְׂרָאֵל וֶוערְט אָנְגֶערוּפְן 'יוֹסֵף' [אַזוֹי וִוי רַשְׁ"י (תהלים פ ב) וְכָל יִשְׂרָאֵל נִקְרָאִים עַל שֵׁם יוֹסֵף] אוּנְז גֵייעֶן אַלֶע אַרוֹיס פון אוּנְזֶער גֶעפֶענְגֶענִישׁ אִין רֹאשׁ הַשָּׁנָה, יֶעדער אֵיינֶער פון זֵיין אֵייגֶענֶע תְּפִיסָה, דֶער מֶענְטְשׁ וֶוערְט מֶער דֶערְהוֹיבְּן אוּן עֶר הָאט דֶער מֶעגְלִיכְקֵייט זִיךְ אַרוֹיס צוּ זֶען פוּן זֵיין גֶעוֶוענְלִיכְן מַעָב אָן קֵיין שְׁוֶוערִיגְקֵייטְן.
הוֹיפְט פוּנֶעם יָאר
מֶען קֶען דָאס עֶרְקְלֶערְן מִיט אַ מָשָׁל, צוּ אַ גְרוֹיסֶע הֶענְג-לֵייכְטֶער וָואס אִיז צוּגֶעבִּינְדֶען צוּם דָאךְ, אוּן דָאס גִיבְּט לִיכְטִיגְקֵייט פַאר דִי גַאנְגֶע צִימֶער. וַיְהִי הַיּוֹם אֵיינֶער וָואס הָאט זִיךְ גֶעדְרֵייט אוֹיף דִי דָאךְ, הָאט גֶעזֶען עֶפֶעס אַ שְׁטְרִיק, אוּן עֶר הָאט דָאס גֶערִיסְן, אוֹיפְן מִינוּט הָאט עֶר נִישְׁט גֶעכַאפְּט וָואס עֶר טוּט, אָבֶּער אוֹיפְן זֶעלְבְּן מִינוּט אִיז דֶער הֶענְג-לֵייכְטֶער אַרָאפּ גֶעפַאלְן, אוּן אַלֶע לֶעקְטֶערְ'ס זֶענֶען צוּשְׁמֶעטֶערְט גֶעוָוארְן.
דֶער נִמְשָׁל גֵייט אַרויף אוֹיף רֹאשׁ הַשָּׁנָה דָאס אִיז דֶער הוֹיפְט טָאג פוּנֶעם יָאר, וָואס דָאס הַאלְט צוּזַאם אַלֶע תְּפִלּוֹת פוּן אַ גַאנְץ יָאר, אַלֶע תְּפִלּוֹת אוּן בַּקָּשׁוֹת וָואס מֶען גִייט זִיךְ אוֹיסְבֶּעטְן בְּמֶשֶׁךְ דֶעם יָאר, אִיז גֶעוָואנְדֶען אִינֶעם הוֹיפְט תְּפִלָה, וָואס דָאס אִיז אִין דִי טֶעג, אוֹיבּ מֶען לֵייגְט אַרֵיין כּוֹחוֹת אוּן מְ'נוּצְט אויס דִי טֶעג און מְיבֶּעט זִיךְ אוֹיס בֵּיים רִבּוֹנוֹ שֶׁל עוֹלָם, שְׁטֶעלְט מֶען אַוֶועק אַ שְׁטַארְקֶער יְסוֹד, וָואס אוֹיף דֶעם אַרוֹיף שְׁטֵייט אַלֶע תְּפִלּוֹת.
דָאס שְׁטִימְט זֵייעֶר גוּט מִיט דִי גְּמָרָא (שם) וַוייטֶער בְּרֹאשׁ הַשָּׁנָה בָּטְלָה שְׁלֹמֹה הַמֶּלֶךְ (קהלת ז ח) זָאגְט טוֹב אַחֲרִית דָּבָר וֶוען אִיז גוּט דֶעם סוֹף, מֵרֵאשִׁיתוֹ וֶוען עֶס אִיז דָא אַ גוּטֶע אָנְפַאנְג. וֶוען מֶען בּוֹיעֶט אַ גוּטֶע יְסוֹד, אוּן מֶען לֵייגְט זִיךְ אַרֵיין אִין דִי עֲבוֹדַת הַתְּפִלָּה אָנְפַאנְג יָאר.
הֵיילִיגֶער בַּעַל שֵׁם טוֹב זי"ע אַ מָשֶׁל וָואס גִיבְּט צוּ פַארְשְׁטֵיין דֶער חֲשִׁיבוּת פוּן תְּפִלָה אִין דִי טֶעג.
אַ קֶענִיג הָאט זִיךְ גֶעבּוֹיט גָאר שְׁטַארְקֶער וֶוענְט אַרוּם זֵיין פַאלַאץ, אוֹיסֶער דֶעם הָאט עֶר זִיכֶער גֶעמַאכְט צוּ אַרוּם רִינְגְלֶען זֵיין פַאלַאץ מִיט גְרוֹיסֶע מִילִיטֶער, אוּן מִיט אַסַאךְ שְׁרֶעקֶעדִיגֶע חַיּוֹת, אוּן וַואטֶערְן, אַזוֹי אַז מֶען זָאל נִישְׁט קֶענֶען אָנְקוּמֶען צוּ קֶענִיג אוּמְגֶעלַאדֶענְט.
וּתְפִלָה.. מַעֲבִירִין אֶת רֹעַ הַגְּזֵרָה
עֶס שְׁטֵייט אִין מִדְרָשׁ (לך לך מה ד) וְלָמָּה נִתְעַקְרוּ הָאִמָּהוֹת פַארְוָואס זֶענֶען דִי אִמָהוֹת גֶעוֶוען קִינְדֶערְלָאז, שהקב"ה מִתְאַזֶּה לִתְפִלָתָן וּמִתְאַזֶּה לְשִׂיחָתָן וֵוייל דֶער אֵייגֶערְשְׁטֶער גְלִיסְט צוּ דִי תְּפִלּוֹת פוּן צַדִּיקִים וָואס וֶויינֶען זִיךְ אוֹיס מִיט אַן אֱמֶתֶ'ע הַארְץ, אוּן דִי תְּפִלּוֹת פוּן דִי אִמָהוֹת זֶענֶען טַאקֶע אָנְגֶענוּמֶען גֶעוָוארְן אוֹיף רֹאשׁ הַשָּׁנָה, אַזוֹי וִוי עֶס שְׁטֵייט אִין גְמָרָא (ראש השנה י:) בְּרֹאשׁ הַשָּׁנָה נִפְקְדָה שָׂרָה רָחֵל וְחַנָּה.
פוּן דִי אִמָהוֹת קֶען מֶען זִיךְ אַרוֹיס לֶערְנֶען אוּן פַארְשְׁטֵיין וִוי גְרוֹיס אוּן חָשׁוּב דִי תְּפִלּוֹת אִין דִי טֶעג טוּעֶן אוֹיף, שָׂרָה אִמֵנוּ אִיז גֶעוֶוען אַן אַלְטֶע פְרוֹי פוּן נֵיינְצִיג יָאר, וָואס עפ"י דֶּרֶךְ הַטֶבַע הָאט זִי נִישְׁט גֶעקֶענְט הָאבְּן קֵיין קִינְדֶער, דָאךְ אִיז אִירֶע תְּפִלָה גֶעוָוארְן אָנְגֶענוּמֶען, וֶוען זִי הָאט זִיךְ אוֹיסְגֶעבֶּעטְן אוֹיף רֹאשׁ הַשָּׁנָה.
אַזוֹי אוֹיךְ גֶעפִינֶען מִיר בֵּיי חַנָּה, וָואס אִיז אַלְט גֶעוֶוען הוּנְדֶערְט אוּן דְרֵייסִיג יָאר (מדרש שמואל ד א) און דוּרְךְ אִירֶע תְּפִלָּה אִיז זִי אוֹיפְגֶערָאכְטְן גֶעוָוארְן אוּם רֹאשׁ הַשָּׁנָה, וַיִּתֵּן ה' לִי אֶת שְׁאֵלָתִי אֲשֶׁר שָׁאַלְתִּי מֵעִמּוֹ.
מִן הַמִּצַר קָרָאתִי
דֶער דֶּגֶל מַחֲנֵה אֶפְרַיִם (הפטרה פרשת כי תבוא) בְּרֶענְגְט פוּן זֵיין זֵיידֶע דֶער טֵייעֶרֶע חֲפֵצִים, מִיט גְרוֹיס פְרֵייד הָאבְּן זֵיי זִיךְ אָנְגֶעפִילְט זֵייעֶרֶע זֶעקְלֶעךְ מִיט דִי אַלֶע וֶוערְדְפוּלֶע מַתָּנוֹת אוּן זִיךְ צוּרִיק גֶעקֶערְט אַהֵיים.
אָבֶּער דֶער בֶּן מֶלֶךְ וָואס זֵיין הַארְץ הָאט גֶעגְלוּסְט אוּן גֶעלֶעכְצְט צוּ זֶען דֶעם אוֹר פְּנֵי מֶלֶךְ, אוּן זִיךְ צוּ טְרֶעפְן פָּנִים אֶל פָּנִים מִיטְן קֶענִיג, הָאט נִישְׁט אוֹיפְגֶעגֶעבְּן אוֹיף דִי שְׁוֶוערֶע וֶועג, אוּן עֶר הָאט פַארְקוּקְט אוֹיף אַלֶע מַתָּנוֹת, אוּן גָארְנִישְׁט הָאט אִים גֶעקֶענְט צוּרִיק הַאלְטְן צוּ אָנְקוּמֶען צוּם קֶענִיג, צוּ הָאבְּן דֶער זְכִיָּה צוּ זֶען דֶעם קֶענִיג אַלֵיין. אוּן וִוי שְׁוֶוערֶע עֶס אִיז אִים גֶעוֶוען דֶער וֶועג, הָאט עֶר אַלְס מֶער גֶעוֶויינְט אוּן גֶעקְלָאגְט אַז עֶר דֶער קֶענִיג אִיז אַזוֹי פַארְהוֹילְן, אוּן דָאס הָאט אִים גֶעגֶעבְּן מֶער גְלוּסְטֶענִישׁ צוּ אָנְקוּמֶען צוּם קֶענִיג, אוּן אַזוֹי מִיט מְסִירוּת נֶפֶשׁ הָאט עֶר אַדוּרְךְ גֶעמַאכְט דֶעם גַאנְגֶען שְׁוֶוערֶע וֶועג, צְוִוישְׁן וַואטֶערְן אוּן גְרוֹיסֶע וֶוענְט.
וֶוען עֶר אִיז אָנְגֶעקוּמֶען צוּם קֶענִיג אַלֵיין, אִיז עֶר גֶעוָוארְן אוֹיסֶער זִיךְ פוּן פְרֵייד, אַלֶע הַסְתָּרַת פָּנִים אוּן אַלֶע שְׁוֶוערִיגְקֵייטְן וָואס עֶר הָאט גֶעשְׁוִוינְט צוּ אָנְקוּמֶען אַהֶער, זֶענֶען פַארְגֶעסְן גֶעוָוארְן, אוּן אַזוֹי הָאט עֶר זִיךְ גֶעקֶענְט אַרוּם דְרֵייעֶן פְרַאנְק אוּן פְרֵיי אִין דֶעם קֶענִיגְלִיכְן פַאלַאץ. אוּן דֶער קֶענִיג הָאט אִים בַּאֹהֶערְט אוּן אִים אָנְגֶעטוּן אַ שֵׁיינֶע קְרוֹין, אוּן שֵׁיינֶע קְלֵיידֶער, אוּן עֶר הָאט אִים גֶעזָאגְט "דִי גַאנְגֶע סְבָּה פַארְוָואס אִיךְ הָאבּ גֶעמַאכְט אַזוֹי שְׁוֶוער מֶען זָאל אָנְקוּמֶען צוּ מִיר, אִיז נָאר גֶעוֶוען כְּדַאי צוּ פְּרוּאוֶוען און צוּ זֶען אויב דוּ הַאלְסְט טָאקֶע דֶערְבֵּיי".
דֶער נִמְשֶׁל אִיז גָאר פַארְשְׁטֶענְדְלִיךְ, מִיר קִינְדֶער דָארְפְן נָאר גְלוּסְטְן אוּן זִיךְ אֵיינְבֶּעטְן בֵּיים גְרוֹיסְן פָאטֶער דֶער גְרוֹיסְן קֶענִיג דֶער מֶלֶךְ מַלְכֵי הַמְּלָכִים, אוּן וֶוען מֶען הָאט דֶער זְכִיָּה אוּן מְ'וַויינְט זִיךְ אוֹיס צוּם אֵייגֶערְשְׁטְן, גֶעמְט עֶר אוּנְז אַרוּם מִיט אַ מוֹרָא'דִיגֶע מָאס לִיבְּשָׁאפְט וָואס אִיז נִישְׁט מֶעגְלִיךְ צוּ אָפְשָׁצְן. אַשְׁרֵי הָעָם יוֹדְעֵי תְרוּעָה וואויל אִיד דֶער מֶענְטְשׁ וָואס פַארְשְׁטֵייט אוּן וַוייסְט אַז דִי אַלֶע הַסְתָּרַת פָּנִים, אוּן דִי שְׁוֶוערִיגְקֵייטְן צוּ אָנְקוּמֶען צוּם טָאטֶען, אִיז נָאר אַ בְּלֶענְדֶענִישׁ כְּדֵי מִיר זָאלְן אָנְקוּמֶען צוּ בְּאוֹר פָּנֶיךָ יְהַלֵכוּן צוּ וֶוערְן נָאנְטֶער צוּם גְרוֹיסְן מֶלֶךְ דֶער הֵיילִיגֶע בַּאשֶׁעפֶער.
רֹאשׁ הַשָּׁנָה וֶוערְט אֶנְגֶערוּפְן אִין פָּסוּק 'בַּכֶּסֶה' עֶס אִיז אַ בְּחִינָה פוּן בַּאהַאלְטְן, אוּן דוּרְךְ דֶעם וָואס מֶען גִייט אַרֵיין אִין דִי בַּאהֶעלְטֶענִישׁ אוּן מְ'שְׁרֵייט צוּם בַּאשֶׁעפֶער, מִיט אַן אֱמֶתֶ'ע גֶעבֶּעט מֵעֹמֶק הַלֵּב, דָאס אַלֵיין דִי תְּפִלּוֹת, טוּעֶן צוּבְּרֶעכְן אַלֶע מְחִיצוֹת וָואס זֶענֶען נָאר דָא צְוִוישְׁן כְּלַל יִשְׂרָאֵל צוּם רִבּוֹנוֹ שֶׁל עוֹלָם. מִיט אַ לֵב נִשְׁבָּר עֶפְנְט מֶען אוֹיף אַלֶע טוֹיעֶרְן, אוּן אַלֶע שְׁוֶוערִיגְקֵייטְן וֶוערְן גֶעשְׁפָּאלְטְן.*
א. מען פארציילט אז ווען דער בארדיטשובער זי"ע איז זיך געגאנגען טובל'ן אין מקוה איידער די תקיעות, האט דער באשעפער צאמגערופן די מלאכים, און ער האט זיי באפוילן אז זיי זאלן צוברעכן אלע מחיצות וואס זענען מפסיק צווישן כלל ישראל צום רבונו של עולם, ווייל ווייל אויב דער בארדיטשובער וועט נאר זען אפילו איין מחיצה, וועט ער נישט רוען ביז ווילאנג זיי ווערן צעבראכן. און ווען דער קדושת לוי איז ארויס פון מקוה, האט דער באשעפער געהייסן די מלאכים אז זיי זאלן אויך צונעמען די שטיינער פון די מחיצות, און עס זאל נישט בלייבן קיין שום סימן פון זיי, ווייל דער גרויסע צדיק קען נישט פארנעמען ווען עס איז דא עפעס וואס איז מפסיק צווישן כלל ישראל און צו זייער טאטע.
יֶעדֶע תְּפִלָּה שְׁפַאלְט הִימְלְן
הרה"ק רַבִּי דָּוִד מֹשֶׁה מִטְשָׁארְטְקָאוו זי"ע הָאט פַארְצֵיילְט אַז וֶוען זֵיין זֵיידֶע רַבִּי שָׁלוֹם שַׁכְנָא זי"ע (דֶער זון פון הרה"ק רַבִּי אַבְרָהָם הַמַּלְאָךְ זי"ע אוּן דֶער טַאטֶע פוּן דֶער רוּזְנֶער זי"ע) אִיז גֶעוֶוען בֵּיי זֵיין שְׁוֶוער דֶער מְאוֹר עֵינַיִם, הָאט פַאסִירְט אַז אִינְמִיטְן דַאוֶוענֶען דִי לֶעצְטֶע תְּפִלָה פוּנֶעם יָאר – מִנְחָה עֶרֶב רֹאשׁ הַשָּׁנָה, אוּן וִוי פַארְשְׁטֶענְדְלִיךְ הָאט דֶער מְאוֹר עֵינַיִם גֶעדַאוֶוענְט דִי לֶעצְטֶע מִנְחָה מִיט גְרוֹיס הִתְלַהֲבוּת, אוּן מִיט הוֹיֶעכֶע כַּנָּנוֹת, אָבֶּער רַבִּי שָׁלוֹם הָאט גֶעשְׁפִּירְט וִוי עֶר קֶען גָארְנִישְׁט מְכַוּן זֵיין, עֶר אִיז גֶעוֶוען אַזוֹי גֶעבְּרָאכְן, דָא הַאלְט מֶען דִי לֶעצְטֶע מִנְחָה פוּן יָאר, אוּן עֶר קֶען נִישְׁט אִינְזִין הָאבְּן קֵיין אֵיין וָוארְט, נָאכְן פְּרָאבִּירְן עֶטְלִיכֶע מָאל צוּ מְצַמְצֵם זֵיין דִי מַחֲשָׁבוֹת, הָאט עֶר עֶנְדְלִיךְ גֶע'פּוֹעלְ'ט בֵּיי זִיךְ צוּ דַאוֶוענֶען וִוי אַ פָּשׁוּטֶ'ע מֶענְטְשׁ, אָן קֵיין כַּנָּנוֹת, בְּלוֹיז מִיטְן אַרוֹיס זָאגְן דִי וֶוערְטֶער אוּן אִינְזִין הָאבְּן דִי פָּשׁוּטֶ'ע טַיִיטְשְׁ וֶוערְטֶער.
בַּאלְד וֶוען מֶען הָאט גֶעעֶנְדִיגְט מִנְחָה, אִיז דֶער מְאוֹר עֵינַיִם צוּגֶעגַאנְגֶען צוּ זֵיין אֵיידֶעם רַבִּי שָׁלוֹם זי"ע אוּן אִים גֶעפְרֶעגְט "וָואס הָאסְטוּ אָנְגֶעדְרֵייט מִיט זֵיין מִנְחָה, אַז דוּ הָאסְט גֶע'פּוֹעלְ'ט גָאר גְרוֹיסֶע זַאכְן אוֹיבְן אִין הִימְל? טוֹיזֶענְטֶע צוּ-וָוארְפֶענֶע נְשָׁמוֹת הָאסְט צָאמְגֶענוּמֶען, אוּן זֵיי אַרויף גֶעבְּרֶענְגְט גָאר הוֹיעֶךְ, וִוי אַזוֹי הָאסְטוּ דָאס בַּאוִויזְן?" הָאט רַבִּי שָׁלוֹם פַארְצֵיילְט אַז עֶר הָאט נִישְׁט גֶעקֶענְט אִינְזִין הָאבְּן בֵּיים דַאוֶוענֶען, אוּן וִויפִיל עֶר הָאט נָאר פְּרָאבִּירְט אִיז עֶס אִים נִישְׁט גֶעלוּנְגֶען. דָאס בְּרֶענְגְט אוּנְז אַרוֹיס אַז מִיט יֶעדֶער תְּפִלָּה קֶען מֶען פּוֹעְלְ'ן און אוֹיפְטוּן אַ גֶעוַואלְד, מֶען דַארְף נִישְׁט פְלִיעֶן אִין קֵיין עוֹלָמוֹת, כְּדֵי דִי תְּפִלּוֹת זָאלְן וֶוערְן אָנְגֶענוּמֶען, נָאר מִיט אַבִּיסְל כַּוָּנָה אוּן גֶעפִיל, גֵייעֶן דִי תְּפִלּוֹת אַרוֹיף גָאר הוֹיעֶךְ בַּשָּׁמַיִם מִמַּעַל.
וֶוען מִיר הַאלְטְן אִין אַזָא גְרוֹיסְן טָאג, דַארְף מֶען גֶעדֶענְקֶען אַז תְּפִלָה אִיז נְתַקֵן גֶעוָוארְן בְּמָקוֹם קָרְבָּנוֹת, וָואס דָאס טוּט אָפְּוַואשְׁן אוּן אָפְּרֵיינִיגְן דִי עֲבֵירוֹת, אוּן עֶס פָּאדֶערְט זִיךְ אַ גֶעבְּרָאכְן הַארְץ בְּלֵב קָרוּעַ וּמֶרְתָּח, אַזוֹי וֶועט מֶען זוֹכֶה זֵיין אַז דִי תְּפִלּוֹת אוּן בַּקָּשׁוֹת וָואס מִיר בֶּעטְן זָאלְן נִתְקַבֵּל וֶוערְן בְּרַחֲמִים וּבְרָצוֹן, אוּן דֶער עִיקָר אִיז צוּ גֶעדֶענְקֶען צוּ מִתְפַּלֵּל זֵיין אוֹיף כְּבוֹד שָׁמַיִם אוּן אוֹיף דֶעם צַעַר הַשְּׁכִינָה, אוּן אַז מִיר זָאלְן שׁוֹין אוֹיסְגֶעלֵייזְט וֶוערְן בְּקָרוֹב בְּיָמֵינוּ בְּבִיאַת מְשִׁיחַ צִדְקֵנוּ אוּן זוֹכֶה זֵיין צוּ גִיין לִקְרַאת בִּיאַ"ת בֶּ"ן יִשֵׁ"י אָמֵן.