אַיֶיערֶע קִינְדֶער זָאלְט אִיר מוֹדִיעַ זַיין וָואס דָא הָאט זִיךְ גִיטָאן (שיהר"ן ר"ט)
מִיר שְׁטֵייעֶן שׁוֹין אִין גָאר גָאר הוֹיכֶע טֶעג פוּן יֶרַח הָאֵיתָנִים - אַ חֹדֶשׁ וָואס אִיז שְׁטַארְק אוּן מֶעסְט מִיט אַסַאךְ מִצְווֹת - בִּפְרָט דִי טֶעג צְוִוישְׁן יוֹם הַקָּדוֹשׁ מִיט סְכּוֹת. עֶס וֶוערְט אַרַאפְּגֶעבְּרֶענְגְט אִין סְפָרִים הַקְדוֹשִׁים, אַז דִי פִיר טֶעג צְוִוישְׁן יוֹם הַקָּדוֹשׁ מִיט סֶכּוֹת אִיז אַנְטְקֶעגְן דִי פיר אוֹתִיּוֹת פוּן דֶעם אוֹיבֶּערְשְׁטְנְ'ס נָאמֶען.
דֶער הֵיילִיגֶער צַדִּיק אוּן גָאוֹן דֶער חת"ם סוֹפֵר הָאט פוּן גְרוֹיס דְבֵקוּת גֶעשְׁרִיבְּן אִין דִי טֶעג נִגּוּנִים פוּן דְּבֵקוּת צוּם אוֹיבֶּערְשְׁטְן.
חז"ל דַרְשֶׁנֶען אוֹיפְן פָּסוּק "וּלְקַחְתֶּם לָכֶם בַּיּוֹם הָרִאשׁוֹן פְּרִי עֵץ הָדָר (וַיִּקְרָא כג, מ) אַז בַּיּוֹם הָרִאשׁוֹן רוּפְט זִיךְ דֶער עֶרְשְׁטֶער טָאג סֶכּוֹת וַוייל דֶעמָאלְט אִיז רִאשׁוֹן לְחֶשְׁבּוֹן עֲווֹנוֹת, וַוייל בִּיז יוֹם טוֹב סְכּוֹת אִיז מֶען פַארְנוּמֶען נָאר צוּ טוּן מִצְווֹת.
דֶער הֵיילִיגֶער יוֹם טוֹב סְכּוֹת וֶוערְט אֶנְגֶערוּפְן אִין דֶער תּוֹרָה "זְמַן שִׂמְחָתֵינוּ", מֶען מַאכְט דְרַיי מָאל דִי בְּרָכָה פוּן שֶׁהֶחֱיָינוּ, אֵיין מָאל דִי עֶרְשְׁטֶע נַאכְט סֶכּוֹת, אוֹיפְן יו"ט סְכּוֹת אַלֵיין. דִי צְוֵוייטֶע מָאל בַּיים לוּלָב בֶּענְטְשְׁן. דִי דְרִיטֶע מָאל דִי נַאכְט פוּן שְׁמִינִי עֲצֶרֶת אוּן שִׂמְחַת תּוֹרָה.
דִי טֶעג פוּן סְכּוֹת זֶענֶען טֶעג וָואס גִיסְט.
זִיךְ טַייכְן פוּן לִיבְּשָׁאפְט פוּן אוֹיבֶּערְשְׁטְן צוּ אוּנְז אוּן פון אוּנְז צוּם אוֹיבֶּערְשְׁטְן.
מִיר טָארְן חָלִילָה נִישְׁט פַארְגֶעסְן, אַז יֶעדֶער אִיךְ אִיז בַּאלִיבְּט בַּיים אוֹיבֶּערְשְׁטְן אַזוֹי וִוי אַן אֵיין אֵיינְצִיג קִינְד, אַזוֹי וִוי מֶען זָאגְט בַּיי דִי תְּפִלָּה פוּן יָמִים נוֹרָאִים "אָנוּ בָּנֶיךָ וְאַתָּה אָבִינוּ..".
וֶוען מֶען זִינְט אִין דִי הֵיילִיגֶע סוּכָּה, אָדער וֶוען מֶען הַאלְט דִי הֵיילִיגֶע ד' מִינִים, דָארְף מֶען זִיךְ גָאר שְׁטַארְק פְרַייעֶן אַז דֶער אוֹיבֶּערְשְׁטֶער הָאט אוּנְז גֶעגֶעבְּן אַזֶעלְכֶע גוּטֶע מַתָּנוֹת, אַז דִי פִיס זָאלְן זִיךְ הֵייבְּן אוּן גִיין אַ טֶענְצְל (אוֹיב קֵיינֶער וֶוערְט נִישְׁט גֶעשְׁטֶערְט פוּן דֶעם) זִיךְ אוּנְטֶער בְּרוּמֶען אוּן אַרַיינֶעמֶען אִין מַחֲשָׁבָה דֶעם אַשְׁרֵינוּ מַה טוֹב חֶלְקֵינוּ וּמַה נָעִים גּוֹרָלֵנוּ, אַז מִיר הָאבְּן דֶערְלֶעבְּט אוּן זוֹכֶה גֶעוֶוען צוּם הֵיילִיגְן רֹאשׁ הַשָּׁנָה, יוֹם הַקָּדוֹשׁ אוּן יוֹם טוֹב סְכּוֹת, שֶׁהֶחֱיָינוּ וְקִיְמָנוּ וְהִגִּיעָנוּ לַזְמַן הַזֶּה.
עֶס אִיז דָא אַ בַּאקַאנְטֶע מַעֲשֶׂה מִיט ר' נַחְמָן טוּלְטְשִׁינֶער, דֶער תַּלְמִיד אוּן מְשַׁמֵּשׁ פוּן ר' נָתָן, אַז אֵיין יָאר הָאט זִיךְ ר׳ נַחְמָן אָנְגֶערוּפְן צוּ ר' נָתָן אַז נָאכְן זִיךְ אַזוֹי מוּטְשֶׁען אַ גַאנְצְן עֶרֶב יוֹם טוֹב צוּ בּוֹיעֶן דֶער סוּכָּה פִילְט מֶען גָאר אַן אַנְדֶערְן טַעם אִין סְכּוֹת. הָאט זִיךְ ר' נָתָן אָנְגֶערוּפְן: "דָאס הָאסְטוּ נָאךְ נִישְׁט פַארְזוּכְט, זִיךְ צוּ בֶּעטְן בַּיים אוֹיבֶּערְשְׁטְן אַ גַאנְצְן עֶרֶב יוֹם טוֹב, בַּאשֶׁעפֶער, הַטְעִימֵנוּ טַעַם סוּכָה' וָואסְפָארָא טַעם מֶען קֶען דֶעמָאלְטְס שְׁפִּירְן אִין דִי סוּכָּה".
דֶערְפַאר טֵייעֶרֶע קִינְדֶער, אִין דִי הֵיילִיגֶע טֶעג נוּצְט אוֹיס דָאס מוֹיל וָואס מֶער, בִּשְׁעַת מֶען גְרֵייט אָן דִי סוּכָּה, בֶּעטְס בַּיים אוֹיבֶּערְשְׁטְן "הַטְעִימֵנוּ טַעַם סוּכָּה – בַּאשֶׁעפֶער אִיךְ וִויל שְׁפִּירְן אַ טַעַם סוּכָּה", "הַטְעִימֵנוּ טַעַם אַהֲבַת ה'", "הַטְעִימֵנוּ טַעַם שִׂמְחָה באמת".
דֶער אוֹיבֶּערְשְׁטֶער זָאל הֶעלְפְן אַז אַלֶע אִידְן וואוּ זֵיי גֶעפִינֶען זִיךְ זָאלְן הָאבְּן אַ פְרֵיילִכֶע לֶעכְטִיגֶע יוֹם טוֹב, בִּפְרֶט אַז יוֹם טוֹב וֶוערְט נִתְעוֹרֵר אַלֶע מִצְווֹת וָואס מֶען הָאט גֶעטוּן בְּמֶשֶׁךְ דֶעם יָאר, אוּן מֶען קֶען זוֹכֶה זַיין דוּרְךְ דֶעם צוּ תְּשׁוּבָה מֵאַהֲבָה, עֶס זָאל נִשְׁפַּע וֶוערְן אוֹיף אוּנְז און אויף גַאנְץ כְּלַל יִשְׂרָאֵל אַלֶע מִינֵי חֲסָדִים וִישׁוּעוֹת, מִיר זָאלְן אַלֶע זוֹכֶה זַיין צוּ דִי הַבְטָחָה פוּנֶעם נָבִיא "וּשְׁאַבְתֶּם מַיִם בְּשָׂשׂוֹן מִמַּעַיְנֵי הַיְשׁוּעָה (יְשַׁעְיָהוּ יב, ג) אוּן דֶער תַּרְגּוּם זָאגְט אוֹיף דֶעם "עֶנְק זָאלְן בַּאקוּמֶען אַ נַייעֶ לֶערוּנְג (לִמּוּד) מִיט פְרֵייד פוּן דִי אוֹיסְדֶערְוֶועלְטֶע צַדִּיקִים" בִּמְהֵרָה בְּיָמֵינוּ אָמֵן.
אַ פְרֵיילִיכְן שַׁבָּת אוּן אַ פְרֵיילִיכְן יוֹם טוֹב.