ר' ח. ש. פון מודיעין עילית דערציילט:
איך האב ברוך השם די זכיה צו זיין א כולל אינגערמאן. אויסער מיין עיקר באשעפטיגונג — לימוד התורה — פארקויף איך א געוויסע פראדוקט פאר יונגעלייט. פאר דעם צוועק האב איך א שייכות מיט אן אגענט פון א געוויסע פירמע. ער האט ליב ווען מ'ענטפערט אים גלייך ווען ער רופט, און בכלל דארף מען וויסן וויאזוי צו רעדן צו אים כדי צו באקומען די בעסטע סחורה פארן בעסטן פרייז.
איך ארבעט ברוך השם שוין מיט אים פאר א לאנגע צייט, און איך פרוביר ער זאל זיין צופרידן כדי עס זאל זיך אים לוינען צו ארבעטן מיט מיר. כדי אויסצומיידן אומאנגענעמע מצבים, האב איך אים שוין פאראויס געזאגט אז ביינאכט, צווישן אכט-דרייסיג ביז ניין-דרייסיג, קען מען מיך נישט כאפן אויפן טעלעפאן. דאס איז די צייט ווען איך געב איבער א שיעור, און איך קען נישט ענטפערן. "מיר וועלן רעדן פארדעם אדער נאכדעם," האב איך אפגעמאכט מיט אים, און ער האט עס פארשטאנען.
דער סדר מיט דעם אגענט איז אז איך באשטעל א גרויסע צאל פראדוקטן אויף אמאל, ער גרייט אלעס אן, קומט אן מיט די סחורה, און פונקט דעמאלט ווען ער קומט אן מוזן מיר זיך טרעפן. אויב איך בין נישט דארט, קען ער באשליסן מער נישט צו ארבעטן מיט מיר.
יענעם טאג האט דער אגענט געדארפט אנקומען. איך האב געווארט אויף אים, אבער ער איז נישט געקומען. די צייט פונעם שיעור איז אנגעקומען און ער איז נאך אלץ נישט דא. וואס טוט מען יעצט? זאל איך אויפגעבן אויפן שיעור און ווארטן אויפן אגענט, אדער אויפגעבן אויפן אגענט און גיין צום שיעור? איך האב אויסגעוועלט די צווייטע אפציע, אויסגעלאשן דעם טעלעפאן און אריינגעגאנגען צום שיעור. דאס האט געפאדערט אסאך כוחות הנפש און בטחון, אז איך וועל זיכער גארנישט פארלירן פון מיין קביעות עתים צו לערנען.
נאכן שיעור איז דער ראש כולל צוגעקומען צו מיר און געזאגט אז ער וויל קויפן די פראדוקט וואס איך פארקויף אלס א מתנה פאר די יונגעלייט. עס האנדלט זיך פון גאר א גרויסע צאל, וואס מיינט א שיינעם רווח. איך בין געווען ממש איבערגענומען. איך האב געזען אין דעם א יד השם, ווי ער העלפט מיר צוליב דעם וואס איך בין בייגעשטאנען דעם ניסיון.
איך האב גערופן דעם אגענט, און ער האט נישט געזאגט קיין ווארט אויף דעם וואס איך האב אים נישט געענטפערט. מיר האבן גערעדט איבער דעם נייעם באשטעלונג, און די קשר איז ברוך השם געבליבן שטארק, און מיינע פארדינסטן זענען נאר געוואקסן.