Skip to content
עצתו אמונה - אידיש

פרייליך אין די סוכה, פרייליך אין שטוב

  • Sukkos
  • 5787
  • Yiddish
View printout

לְכָבוֹד ... נֵרוֹ יָאִיר

מִיר שְׁטֵייעֶן שׁוֹין עֶרֶב סוּכּוֹת, עֶס קוּמְט שׁוֹין דִי הֵיילִיגֶע יוֹם טוֹב סוּכּוֹת; יֶעדֶע מָאל דוּ גֵייסְט אַריין אִין דִי סוּכָה זָאלְסְטוּ אֵיינְלַאדֶענֶען דִי הֵיילִיגֶע אוּשְׁפִּיזִין, דִי הֵיילִיגֶע גֶעסְט. עֶס שְׁטֵייט אִין זוֹהַר (פַּרְשַׁת אֱמוֹר, קד.) אַז דִי אוּשְׁפִּיזִין קוּמֶען נָאר אַז מֶען רוּפְט זֵיי; זָאלְסְטוּ זָאגְן: "אֲזַמִּין לִסְעוּדָתִי", אִיךְ לַאדְן עֶנְק אֵיין צוּ קוּמֶען צוּ מִיר אִין דִי סוּכָה, "אוּשְׁפִּיזִין עִילָאִין", דִי הֵיילִיגֶע גֶעסְט, "אַבְרָהָם יִצְחָק יַעֲקֹב משֶׁה אַהֲרן יוֹסֵף וְדָוִד", אוּן זָאלְסְט אַכְטוּנְג גֶעבְּן זֵיי זָאלְן נִישְׁט אַנְטְלוֹיפְן פוּן דִיין סוּכָה, זָאלְסְט זִיךְ נִישְׁט אוֹיפְרֶעגְן אוֹיף זַיין וַוייב אוּן קִינְדֶער, אוּן אַז דִי סוּכָה אִיז קְלֵיין, מֶען זִיצְט צֵאמְגֶעשְׁטוּפְט אוּן עֶס גִיסְט זִיךְ אוּן עֶס טוּט זִיךְ – זָאלְסְטוּ בְּלַייבְּן פְרֵיילִיךְ, עֶס זָאל דִיר גָארְנִישְׁט אָנְגֵיין, גֶעדֶענְק וֶוער עֶס זִינְט גֶעבְּן דִיר, גֶעדֶענְק אַז דִי הֵיילִיגֶע גֶעסְט זֶענֶען דָא, אוּן אִיךְ בִּין זִיכֶער אַז וֶוען דוּ וָואלְסְט גֶעהַאט בַּיי דִיר אִין סוּכָה זַיין רָב אָדֶער זַיין דַיָיָּן – וָואלְסְטוּ גֶעזִיצְן אוּן גֶעשְׁמֵייכְלְט, אוּן אֲפִילוּ דִי קִינְדֶער טַאנְצְן אוּן שְׁפְּרִינְגֶען, עֶס גִיסְט זִיךְ אוּן עֶס טוּט זִיךְ וכו' – וָואלְסְטוּ נִישְׁט גֶעשְׁרִיגְן.

קֵיינְמָאל זָאלְסְטוּ נִישְׁט וַוארְפְן אַ זַאךְ פוּן כַּעַס, אָדֶער גֶעבְּרֶעכְן אַ זַאךְ פוּן כַּעַס, עס שְׁטֵייט אִין זְהַר (פַּרְשַׁת פְּקוּדִי, רסג:) אוֹיבּ אַ מֶענְטְשׁ – וֶוען עֶר דֶעגְט זִיךְ אוֹיף – וַוארְפְט עֶר אַ זַאךְ אָדֶער עֶר גֶעבְּרֶעכְט אַ זַאךְ – זֶענֶען דָא מַלְאָכִים סְטֶעצִיעֶל גֶעשְׁטֶעלְט פַאר דֶעם, זֵיי גֶעמֶען דִי זַאךְ וָואס דֶער מֶענְטְשְׁן הָאט גֶעוָוארְפְן אוּן זֵיי בְּרֶענְגֶען דָאס אִין הִימְל פַארְן אֵייגֶערְשְׁטְן אוּן זָאגְן: "קוּק, דֶער מֶענְטְשׁ הָאט גֶעבְּרֶענְגְט אַ קָרְבָּן פַאר עֲבוֹדָה זָרָה", אוּן דִי הֵיילִיגֶע חֲכָמִים זָאגְן (שַׁבָּת קה:): "כָּל הַכּוֹעֶס כְּאִלּוּ עוֹבֵד עֲבוֹדָה זָרָה", וֶוער עֶס אִיז בְּכַעַס אִיז אַזוֹי וִוי עֶר דִינְט עֲבוֹדָה זָרָה; זָאלְסְטוּ זִיךְ זֵייעֶר הִיטְן נִישְׁט צוּ וֶוערְן בְּכַעַס, נִישְׁט וַוארְפְן קֵיין זַאכְן, נִישְׁט גֶעבְּרֶעכְן קֵיין זַאכְן; הָאבּ רַחֲמָנוּת אוֹיף זֵיינֶע קִינְדֶער, וַוייל וֶוען טַאטֶע מַאמֶע זֶענֶען בְּכַעַס גִייעֶן דִי קִינְדֶער צוּגְרוּנְד, דִי גַאנְגֶע שְׁטוּב וֶוערְט חָרוּב.

הַיינְטִיגֶע טֶעג דַארְף מֶען מֶער אַכְטוּנְג גֶעבְּן עֶס זָאל זַיין פְרֵיילִיךְ אִין שְׁטוּבּ, דִי קִינְדֶער זָאלְן לִיבּ הָאבְּן צוּ זַיין אִין שְׁטוּבּ, דִי קִינְדֶער זָאלְן נִישְׁט וֶועלְן אַוֶועק גִיין פוּן דִי אִידִישֶׁע וֶועג; וַוייל אַמָאל אִיז גֶעוֶוען נִסְיוֹנוֹת פוּן מַשְׂכִּילִים, מְחַקְרִים וְכוּ', הַיינְט אִיז נִישְׁטָא דִי נִסְיוֹנוֹת, הַיינְט אִיז דִי נִסָיוֹן אַז מֶענְטְשְׁן וִוילְן לִיבְּשָׁאפְט, מֶענְטְשְׁן וִוילְן וַוארֶעמְקֵייט, אוּן אַז קִינְדֶער בַּאקוּמֶען דָאס נִישְׁט אִין שְׁטוּבּ – זוּכְן זֵיי דָאס בַּיי דִי אוּמוֹת הָעוֹלָם הַשֵׁם יִשְׁמְרֵינוּ; אוּן כָּל שֶׁכֵּן וֶוען מֶען טוּט מִצְווֹת, עֶס קוּמְט שַׁבָּת, עֶס קוּמְט אַ יוֹם טוֹב – מוּז מֶען דָאס מַאכְן מִיט שִׂמְחָה, מִיט לִיבְּשָׁאפְט אוּן וַוארֶעמְקֵייט, אַז דִי קִינְדֶער זָאלְן דָאס וֶועלְן, קִינְדֶער זָאלְן אַרוֹיסְקוּקְן אוּן פְרֶעגְן: "וֶוען קוּמְט שׁוֹין יוֹם טוֹב ? וֶוען קוּמֶען שוֹין דִי טֶעג וָואס עֶס גִייט זַיין זֵייעֶר פְרֵיילִיךְ אִין שְׁטוּבּ ?" אַזוֹי וֶועלְן זֵיי דָאס אָנְהַאלְטְן זֵייעֶר גַאנְץ לֶעבְּן.

דֶער אֵייגֶערְשְׁטֶער זָאל הֶעלְפְן זָאלְסְט הָאבְּן הַצְלָחָה אִין אַלֶע עִנְיָנִים.

אַ פְרֵיילִיכְן יוֹם טוֹב.

More in this printout

View the whole printout