Skip to content
עצתו אמונה - אידיש

אִיךְ בִּין אַן אֵיינְגֶעפַאלֶענֶע סֻכָּה, בּוֹי מִיךְ אוֹיף

  • Sukkos
  • 5787
  • Yiddish
View printout

בְּעֶזְרַת ה' יִתְבָּרַךְ - יוֹם ג' פָּרָשַׁת וְזֹאת הַבְּרָכָה, עֶרְשְׁטֶע אוֹת פוּן שֵׁם הֲוָיָ"ה, י"א תִּשְׁרֵי, שְׁנַת תשפ"ז לִפְרָט קָטָן

... נֵרוֹ יָאִיר

אַשְׁרֵינוּ אַז מִיר זֶענֶען גֶעוֶוען בַּיים רֶבִּי'ן רֹאשׁ הַשָּׁנָה אִין אוּמַאן, מִיר דַארְפְן זִיךְ זֵייעֶר פְרֵייעֶן, דֶער הֵיילִיגֶער רֶבִּי הָאט גֶעזָאגְט (חַיֵּי מוֹהֲרַ"ן, סִימָן תג): "מִי שֶׁזּוֹכֶה לִהְיוֹת עַל רֹאשׁ הַשָּׁנָה רָאוּי לוֹ לִשְׂמֹחַ מְאֹד מְאֹד", וֶוער עֶס קוּמְט צוּ מִיר אוֹיף רֹאשׁ הַשָּׁנָה דַארְף זַיין פְרֵיילִיךְ אַ גַאנְץ יָאר.

וֶוען דוּ זִיצְט אִין דִי סוּכָּה זָאלְסְטוּ אוֹיפְהֵייבְּן דַיין קָאפ, קוּק אַרוֹיף; וָואס זֶעסְטוּ? סְכָךְ, וָואס אִיז סְכָךְ? פוּן וָואס מַאכְט מֶען סְכָךְ? וֶועסְטוּ זֶען אַז מֶען מַאכְט נִישְׁט סְכָךְ - נִישְׁט פוּן זִילְבֶּער, נִישְׁט פוּן גָאלְד, נָאר פוּן 'פְּסוֹלֶת גֹּרֶן וְיֶקֶב', פוּן דִי אִיבֶּערִיגֶע צְוַוייגְלֶעךְ אוּן אִיבֶּערִיגֶע שָׁאלַאכְטְס וָואס מֶען וַוארְפְט גֶעוֶוענְלִיךְ אִין מִיסְט, מֶען קֶען גָארְנִישְׁט מַאכְן דֶערְפוּן, מִיט דֶעם מַאכְט מֶען דִי הֵיילִיגֶע מִצְוָה פוּן סוּכָּה; דָאס לֶערְנְט אוּנְז אַז אֲפִילוּ אֵיינֶער וָואס עֶר שְׁפִּירְט אִיבְּרִיג, עֶר זֶעט זִיךְ וִוי פְּסוֹלֶת... עֶר וֵוייסְט אַז עֶר אִיז אָפְּפַאל, עֶר אִיז גָארְנִישְׁט וֶוערְד, דָאךְ אוֹיב וֶועט עֶר זִיךְ שְׁטַארְקְן נִישְׁט אוֹיפְצוּגֶעבְּן, עֶר וֶועט נִישְׁט אָפְּלָאזְן זַיין גוּטֶע וִוילְן אוּן עֶר וֶועט זָאגְן פַארְן אֵייבֶּערְשְׁטְן אַז עֶר וִויל זַיין גוּט - וֶועט עֶר זוֹכֶה זַיין אַז דִי שְׁכִינָה הַקְּדוֹשָׁה וֶועט בַּיי אִים רוּעֶן.

לִיבֶּער בְּרוּדֶער, וֶוען דוּ זִיצְט אִין דִי הֵיילִיגֶע סוּכָּה, וֶועט דֶער יֵצֶר הָרָע פְּרוּבִּירְן דִיךְ צוּ צֶעבְּרֶעכְן, עֶר וֶועט דִיךְ מַאכְן שְׁפִּירְן וִוי דוּ בִּיסְט שׁוֹין אַ פַארְפַאלֶענֶער, דָאךְ בֶּעט אִיךְ דִיר זָאלְסְט זִיךְ זֵייעֶר שְׁטַארְקְן אוּן זָאג אַפָּאר וֶוערְטֶער צוּם אֵייבֶּערְשְׁטְן, זָאג: "הֵיילִיגֶער בַּאשֶׁעפֶער אִיךְ וֵוייס אַז אִיךְ בִּין 'פְּסוֹלֶת גֹּרֶן וְיֶקֶב', אִיךְ בִּין גָארְנִישְׁט וֶוערְד, אִיךְ בִּין אַזוֹי נִידְרִיג, אִיךְ בִּין אַזוֹי וַוייט פוּן דִיר, אָבֶּער רִבּוֹנוֹ שֶׁל עוֹלָם טִיף אִין מַיין הַארְץ וִויל אִיךְ זַיין גוּט, טִיף אִין מַיין הַארְץ וִויל אִיךְ זַיין אַן עֶרְלִיכֶער אִיד, אִיךְ וִויל דַאוֶוענֶען, אִיךְ וִויל לֶערְנֶען אוּן טוּן דִי מִצְוֹת, אִיךְ בֶּעט דִיר אֵייבֶּערְשְׁטֶער 'וְתָקִים אֶת סֻכַּת דָּוִד הַנֹּפֶלֶת', בּוֹי צוּרִיק אוֹיף מַיין סוּכָּה, מַיין לֶעבְּן, אִיךְ בִּין אַן אֵיינְגֶעפַאלֶענֶע סוּכָּה, בּוֹי מִיךְ אוֹיף, מַאךְ פוּן מַיין פְּסוֹלֶת אַ כְּלִי צוּ מְקַבֵּל זַיין קְדוּשָׁה וְטָהֳרָה, אִיךְ זָאל דִיךְ קֶענֶען דִינֶען מִיט גְרוֹיס שִׂמְחָה אוּן גְרוֹיס פְרֵייד".

דֶער אֵייבֶּערְשְׁטֶער זָאל הֶעלְפְן זָאלְסְט הָאבְּן הַצְלָחָה אִין אַלֶע עִנְיָנִים.

אַ פְרֵיילִיכְן יוֹם טוֹב.

More in this printout

View the whole printout