אִין דִי הֵיילִיגֶע טֶעג קֶען מֶען זִיךְ אַרוֹיסְרַייסְן פוּנֶעם פְּרִיוַואטְן גָּלוּת
- Sukkos
- 5787
- Yiddish
בְּעֶזְרַת ה' יִתְבָּרַךְ – יוֹם א' פַּרְשַׁת וְזֹאת הַבְּרָכָה, עֶרֶב יוֹם הַכִּיפּוּרִים, ט' תִּשְׁרֵי, שְׁנַת תשפ"ז לִפְרַט קָטָן
... נֵרוֹ יָאִיר
אַ זִיס יָאר פַאר דִיר אוּן פַאר דִיין מִשְׁפָּחָה, אִיךְ הָאבּ זֵייעֶר הַנָאָה גֶעהַאט דִיךְ צוּ זֶען אִין אוּמַאן בַּיים הֵיילִיגְן רֶבִּי'ן רֹאשׁ הַשָּׁנָה, אִיךְ וִויל דִיר זָאגְן אַז אִיךְ בֶּענְק זִיךְ זֵייעֶר צוּ דִיר, אִיךְ וִויל בַּאנַייעֶן אוּנְזֶער קֶשֶׁר אַזוֹי וִוי אַמָאל, אִיךְ הָאבּ דִיךְ לִיבּ, אִיךְ וִויל מֶער הָאבְּן שַׁיְיכוּת מִיט דִיר.
יֶענְט וֶוען מִיר שְׁטֵייעֶן אִין דִי הֵיילִיגֶע טֶעג פוּן רֹאשׁ הַשָּׁנָה, עֲשֶׂרֶת יְמֵי תְּשׁוּבָה, יוֹם הַקָדוֹשׁ, יוֹם טוֹב סוכות, הוֹשַׁעְנָא רַבָּה, הַקָפוֹת - אִיז דָא אַ הֵיילִיגְקֵייט אוּן אַ הֶעכֶערֶע כֹּחַ פַאר יֶעדְן אִיךְ זִיךְ צוּ קֶענֶען אַרוֹיסְרַייסְן פוּן זַיין פְּרִיוַואטֶע גָלוּת וואוּ עֶר אִיז פַארְכָאפְט, אוּן אֲפִילוּ מֶען אִיז פַארְכַאפְּט אִין קוּקְן עֲבֵירוֹת, מֶען אִיז צוּגֶעקְלֶעבְּט צוּם טֶעלֶעפָאן, טֶעבְּלֶעט, קָאמְפִּיוּטֶער וְכַדּוֹמָה, וָואס בְּדֶרֶךְ הַטֶבַע אִיז נִישְׁט שַׁיָיךְ זִיךְ אָפְּצוּשֵׁיידְן פוּן דֶעם, נָאר דוּרְךְ וִויינֶען אוּן שְׁרֵייעֶן צוּם אֵייגֶערְשְׁטְן קֶען מֶען בַּאפְרַייט וֶוערְן פוּן זֵיי; זָאלְסְטוּ אוֹיסְנִיצְן דִי הֵיילִיגֶע טֶעג צוּ בֶּעטְן דֶעם אֵייגֶערְשְׁטְן, בֶּעט: "הֵיילִיגֶער בַּאשֶׁעפֶער וָואס וֶועט זַיין מִיט מַיין נְשָׁמָה ? וָואס וֶועט זַיין מִיט מַיינֶע דוֹרוֹת? אִיךְ בִּין אַזוֹי אָפְּגֶעקִילְט, אִיךְ בִּין אַזוֹי פַארְזִינְקֶען אִין דִי טוּמְאָה, אִיךְ קוּק אִין טֶעלֶעפָאן, אִיךְ קוּק אִין קָאמְפִּיוּטֶער, אוּן דָאס הָאט מִיךְ אַזוֹי אָפְּגֶעקִילְט, רִבּוֹנוֹ שֶׁל עוֹלָם, אִיךְ הָאבּ אָבֶּער נִישְׁט דִי שְׁטַארְקְקֵייט דָאס אַוֶועק צוּ וַוארְפְן, עֶס צִיט מִיר אַזוֹי גֶעפֶערְלִיךְ, אִיךְ בִּין צוּגֶעקְלֶעבְּט צוּ דֶעם וִוי מִיט אַ שְׁטַארְקֶע גְלוּ; אִיךְ קוּק עֲבֵירוֹת, אִיךְ קוּק לֵיצָנוּת, אִיךְ בִּין נִישְׁט וִוי אַמָאל, וואוּ אִיז מַיין תְּמִימוּת ? וואוּ אִיז מַיין יִרְאַת שָׁמַיִם ? אִיךְ בֶּעט דִיר הֵיילִיגֶער בַּאשֶׁעטֶער, הֶעלְף מִיר, מַאךְ מִיר נֵס עֶס זָאל אַרַיינְגֵיין אִין מִיר אַ רוּחַ טָהֲרָה, אִיךְ זָאל תְּשׁוּבָה טון אוּן זַיין אַן עֶרְלִיכֶער אִיךְ מִיט רֵיינֶע אוֹיגְן", וואוֹיל אִיז דֶעם וָואס נִיצְט אוֹיס דִי הֵיילִיגֶע טֶעג.
אַ גוּט יוֹם טוֹב, אַ גְמַר חֲתִימָה טוֹבָה.