בְּעֶזְרַת ה' יִתְבָּרַךְ - עֶרֶב שַׁבָּת קוֹדֶשׁ פָּרָשַׁת הַאֲזִינוּ - שַׁבַּת תְּשׁוּבָה, ז' תִּשְׁרֵי, שְׁנַת תשפ"ז לִפְרָט קָטָן
... נֵרוֹ יָאִיר, בֵּית שֶׁמֶשׁ
אִיךְ הָאבּ עֶרְהַאלְטְן דַיין בְּרִיוו.
אִיךְ הָאבּ הֲנָאָה צוּ זֶען דַיינֶע חִידוּשֵׁי תּוֹרָה וָואס דוּ בִּיסְט מְחַדֵשׁ מִיט דִי הַקְדָמוֹת פוּן הֵיילִיגְן רֶבִּי'ן, וָואס בְּלָאזְט אַרַיין חַיוּת אִין נִשְׁמוֹת יִשְׂרָאֵל, אַז אֲפִילוּ אַ 'צִיפּוֹר שֶׁמָרְדָה', אַ נְשָׁמָה וָואס אִיז פַארְבְּלָאנְדְשֶׁעט פוּן דִי קְדוּשָׁה - "כָּל הֵיכָא דְאִיתֵיהּ בְּבֵי גַזָא דְרַחֲמָנָא אִיתֵיהּ דִכְתִיב (תְּהִלִים כד, א): 'לַה' הָאָרֶץ וּמְלוֹאָהּ'" (חוּלִין קלט.), אִיז מֶען נָאכְאַלְץ בַּיים אֵייבֶּערְשְׁטְן, מֶען קֶען זִיךְ נָאךְ צוּרִיק קֶערְן, מֶען קֶען תְּשׁוּבָה טוּן.
לְכָבוֹד דִי נַייע יָאר זָאלְסְטוּ זִיךְ שְׁטַארְקְן אִין 'הֲפָצָה', גֵיי הֲפָצָה בַּיי דִי פְרוּמֶע שְׁטִיבֶּער, גֵיי הֲפָצָה צוּ כּוֹלֵל אִינְגֶעלַייט אוּן בַּחוּרֵי יְשִׁיבָה; בַּיי עֶנְק אִיז דָא אַסַאךְ מְפִיצִים וָואס גֵיייְן צוּ דִי נִישְׁט פְרוּמֶע גֶעגְנְטֶער, מִיר דַארְפְן מְפִיצִים בַּיי דִי פְרוּמֶע; קֵיינֶער וֵוייסְט נִישְׁט וָואס גֵייט אַרִיבֶּער אוֹיף דִי עֶרְלִיכֶע אִינְגֶעלַייט, מֶען מֵיינְט אַז מֶען דַארְף גֵיין הֲפָצָה נָאר בַּיי דִי וָואס מֶען הָאט נֶעבֶּעךְ אַוֶועק גֶעפִירְט פוּן אִידִישְׁקֵייט אוּן אוֹיסְגֶע'שְׁמַד'ט רַחֲמָנָא לִצְלָן, מֶען דַארְף הַיינְט אַסַאךְ מֶער עוֹסֵק זַיין אִין קֵירוּב קְרוֹבִים, דִי הֵיימִישֶׁע צִיבּוּר אִיז אַזוֹי צֶעבְּרָאכְן, דִי בִּילְד פוּן אִינְדְרוֹיסְן אִיז טַאקֶע זֵייעֶר שֵׁיין, אָבֶּער פוּן אִינֶעוֵויינִיג אִיז מֶען אוֹיסְגֶעלֵאשְׁן אוּן אוֹיסְגֶעבְּרֶענְט, מֶען אִיז אוֹיפְגֶעגֶעבְּן, אוּן אַלֶע וַוארְטְן אוֹיף חִיזוּק, חִיזוּק אוֹיף אֱמוּנָה; זָאלְסְטוּ גֵיין דַיְקָא אִין כּוֹלְלִים, אִין יְשִׁיבוֹת אוּן אִין שׁוּלְן.
אוֹיךְ בֶּעט אִיךְ דִיר זֵייעֶר, זֵיי מְחַזֵק אַנְשֵׁי שְׁלוֹמֵינוּ, בְּעִיקַר דִי בַּחוּרִים אוּן דִי אַבְרֵכִים - זֵיי זָאלְן הֶערְן דִי שִׁיעוּרִים, דִי טֶעגְלִיכֶע שִׁיעוּרִים וָואס מֶען גֶעבְּט אִין יְשִׁיבָה אוּן זִיכֶער דִי וֶועכְנְטְלִיכֶע שִׁיעוּר פַאר אִינְגֶעלַייט; עֶס אִיז אַזוֹי וִויכְטִיג צוּ הֶערְן דֶעם רֶבִּינְ'ס עֵצוֹת, חִיזוּק אוּן שֵׂכֶל, נָאר אַזוֹי קֶען מֶען זִיךְ דֶערְהַאלְטְן, נָאר אַזוֹי קֶען מֶען זִיךְ הַאלְטְן פְרִישׁ, אוּן נִישְׁט וֶוערְן אַלְט.
דֶער אֵייבֶּערְשְׁטֶער זָאל הֶעלְפְן זָאלְסְט הָאבְּן הַצְלָחָה אִין אַלֶע עִנְיָנִים.
אַ גְמַר חֲתִימָה טוֹבָה.