בְּעֶזְרַת ה' יִתְבָּרַךְ - עֶרֶב שַׁבָּת קוֹדֶשׁ פַּרְשַׁת הַאֲזִינוּ – שַׁבָּת תְּשׁוּבָה, ז' תִּשְׁרֵי, שְׁנַת תשפ"ז לִפְרָט קָטָן
הָרַב ... שְׁלִיטָ"א, יְרוּשָׁלַיִם
אִיךְ הָאבּ עֶרְהַאלְטְן זַיין בְּרִיוו בַּיי פִּדְיוֹן נֶפֶשׁ אִין אוּמַאן.
שְׁטַארְק זִיךְ מִיט אַלֶע זַיינֶע כּוֹחוֹת נִישְׁט צוּ זַיין אִין עַצְבוּת אוּן מָרָה שְׁחוֹרָה, נָאר זַיין פְרֵיילִיךְ מִיט יֶעדֶע גוּטֶע זַאךְ וָואס דוּ טוּסְט, אוּן מִיט דֶעם וֶועט זַיין מַאמֶע'ס נְשָׁמָה גֵיין הֶעכֶער אוּן הֶעכֶער אוֹיבְן אִין הִימְל; וַוייל וֶוען אַ מֶענְטְשׁ לָאזְט אִיבֶּער קִינְדֶער וָואס דִינֶען דֶעם אֵייגֶערְשְׁטְן, זֵיי לֶערְנֶען אוּן דַאוֶוענֶען און טוּעֶן מִצְווֹת מִיט שִׂמְחָה - דָאס אִיז דִי גְרֶעסְטֶע זַאךְ פַארְן מֶענְטְשׁ, דִי נְשָׁמָה גִייט אַרוֹיף הֶעכֶער אוּן הֶעכֶער מִיט יֶעדֶע מִצְוָה וָואס מֶען טוּט מִיט שִׂמְחָה.
אִיךְ הָאבּ גֶעלֵיינְט זַיין בְּרִיוו, אִיךְ בִּין זֵייעֶר בַּאזָארְגְט פַאר דִיר; דוּ בִּיסְט נִישְׁט דֶער עֶרְשְׁטֶער וָואס לַיידְט פוּן דִי מַחֲשָׁבוֹת, אִיךְ זֶע בַּיי זֵייעֶר אַסַאךְ מֶענְטְשְׁן וָואס פַארְלִירְן זֵייעֶר בַּאלִיבְּטֶער טַאטֶע אָדֶער בַּאלִיבְּטֶע מַאמֶע, וִוי זֵיי הֵייבְּן אָן לַיידְן שְׁרֶעקְלִיכֶע יְסוּרִים פוּן דִי מַחֲשָׁבוֹת וְכוּ': 'אִיךְ הָאבּ גוֹרֶם גֶעוֶוען אַז מַיין מַאמֶע אָדֶער טַאטֶע זָאלְן שְׁטַארְבְּן וְכוּ'; קְלַאפּ אַרוֹיס פוּן קָאפּ דִי נַארִישֶׁע זַאךְ אַז דוּ הָאסְט גוֹרֶם גֶעוֶוען אַז זַיין מַאמֶע זָאל אַוֶועק גִיין פוּן דִי וֶועלְט, דִי מַחֲשָׁבָה אִיז פוּן דִי סִטְרָא אַחֲרָא וָואס וִוילְן דִיךְ אוּמְגְלִיקְלִיךְ מַאכְן אוּן דִיךְ אוֹיסְרַייסְן פוּן דִי וֶועלְט אוּן פוּן יֶענֶע וֶועלְט; דָאס אִיז לִיגְנְט, דוּ הָאסְט נִישְׁט גוֹרֶם גֶעוֶוען אַז זַיין מַאמֶע זָאל אַוֶועק גִיין פוּן דִי וֶועלְט, זַיין מַאמֶע אִיז אַוֶועק פוּן דִי וֶועלְט אִין דִי רֶגַע וָואס זִי הָאט גֶעדַארְפְט אַוֶועק גִיין, זִי הָאט נִישְׁט גֶעהַאט מֶער קֵיין אֵיין רֶגַע צוּ לֶעבְּן.
שְׁטַארְק זִיךְ זֵייעֶר צוּ זַיין זֵייעֶר פְרֵיילִיךְ וֶועסְטוּ מַאכְן אַ נַחַת רוּחַ פַאר זַיין מַאמֶע אִין גַן עֵדֶן. זַיין מַאמֶע אִיז גֶעוֶוען אַ צַדִיקֶת, זִי הָאט זִיךְ מוֹסֵר נֶפֶשׁ גֶעוֶוען פַאר תּוֹרָה, זִי הָאט אַלֶעס גֶעטוּן אַז אִיר שְׁטוּבּ זָאל זַיין אַ שְׁטוּבּ פוּן תּוֹרָה, אוּן אַז דוּ וֶועסְט זַיין פְרֵיילִיךְ, דוּ וֶועסְט דַאוֶוענֶען מִיט שִׂמְחָה, דוּ וֶועסְט לֶערְנֶען מִיט שִׂמְחָה אוּן טוּן אַלֶע מַעֲשִׂים טוֹבִים מִיט שִׂמְחָה – וֶועסְטוּ אִיר מַאכְן אַ גְרוֹיסֶע נַחַת רוּחַ.
אַ גְמַר חֲתִימָה טוֹבָה.