בְּעֶזְרַת ה' יִתְבָּרַךְ – עֶרֶב שַׁבָּת קוֹדֶשׁ פַּרְשַׁת הַאֲזִינוּ – שַׁבָּת תְּשׁוּבָה, ז' תִּשְׁרֵי, שְׁנַת תשפ"ז לִפְרָט קָטָן
... נֵרוֹ יָאִיר
אִיךְ וִויל דִיר בֶּעטְן, דִי קוּמֶענְדִיגֶע יָאר זָאלְסְטוּ אָפְּלָאזְן אַלֶע גַבָּאוּת אוּן אַלֶע עַסְקָנוּת וְכוּ' אוּן זִיךְ אַרַיינְלֵייגְן נָאר אִין דִי יְשִׁיבָה, אִיךְ וֶועל אִם יִרְצֶה הַשֵׁם טְרֶעפְן אַ זֵייעֶר גַבְּאֵי זָאל הֶעלְפְן מִיט אַפּוֹינְטְמֶענְטְס, מִיט מַאכְן סֵדֶר אוֹיפְצוּנֶעמֶען מֶענְטְשְׁן יֶעדֶע זוּנְטָאג וְכַדוֹמֶה, אִיךְ וִויל פוּן דִיר אֵיין זָאךְ - נָאר דִי יְשִׁיבָה; יֶעדער בָּחוּר זָאל בַּאקוּמֶען דָאס מֶערְסְטֶע אוֹיפְמֶערְקְזַאמְקֵייט, וַוארֶעמְקֵייט אוּן לִיבְּשָׁאפְט, סְטֶעצִיעֶל דִי קִינְדֶער פוּן אַנְשֵׁי שְׁלוֹמֵינוּ זָאלְן נִישְׁט אַוֶועק פַאלְן, אַלֶע זָאלְן דִינֶען דֶעם אֵייגֶערְשְׁטְן מִיט דִי עֵצוֹת אוּן חִיזוּק פוּן הֵיילִיגְן רֶבִּי׳ן.
עֶס אִיז דָא אַ גְרוֹיסֶע יֵצֶר הָרָע צוּ וֶועלְן טוּן זַאכְן וָואס מֶען דַארְף נִישְׁט טוּן, אוּן דִי זַאכְן וָואס מֶען דַארְף טוּן – נִישְׁט צוּ טוּן, דִי הֵיילִיגֶע חֲכָמִים זָאגְן (קִדּוּשִׁין לֹא.): "גָּדוֹל מְצֶוֶה וְעוֹשֶׂה", עֶס אִיז גְרֶעסְער אוּן הֵיילִיגֶער צוּ טוּן וָואס מֶען הָאט זִיךְ אוּנְטֶערְגֶענוּמֶען צו טון; אוּן אַז דוּ הָאסְט גֶענוּמֶען דִי זַאךְ צוּ הֶעלְפְן אִין יְשִׁיבָה – זָאלְסְטוּ נִישְׁט וֶוערְן אוּמְדִירֶעקְט אַרַיינְגֶעדְרֵייט אִין עַסְקָנוּת, גַּבָּאוּת אִין דִי קְהִלָה.
אִיךְ וִויל דִיר בֶּעטְן דוּ זָאלְסְט זֶען אַז דִי בָּחוּרִים זָאלְן יֶעדְן טָאג גוֹרֵס זַיין חַ"י פְּרָקִים מִשְׁנַיוֹת אוּן זָאגְן דֶעם יוֹם תְּהִלִים, יֶעדֶער בָּחוּר זָאל לֶערְנֶען יֶערְן טָאג חוּמָשׁ רַשִׁ"י, שְׁנַיִם מִקְרָא וְאֶחָד תַּרְגוּם, אוּן יֶעדֶער בָּחוּר זָאל הָאבְּן אַ כָּשֶׁרְעֶ טֶעלֶעפָאן אָן קֵיין טֶעקְסְט מֶעטֶערְדְשׁ, אָן קֵיין וִוידִיאוֹ, אָן קֵיין בִּילְדֶער. אִיךְ זֶע וָואס גֵייט פָאר צְוִוישְׁן דִי בָּחוּרִים, מֶען טְשֶׁעטֶעט זִיךְ, מֶען טוּט זִיךְ וִויי, מֶען מַאפְּט אָפּ אֵיינֶער פוּן אַנְדֶערֶע וִוי מֶען דְרִימְלְט, וִוי מֶען עֶסְט, אוּן מֶען שִׁיקְט דָאס פַאר חֲבֵרִים, מֶען אִיז מַלְבִּין פְּנֵי חֲבֵרוֹ בָּרַבִּים, וָואס אִיז אַזוֹי גֶעפֶערְלִיךְ, אֵין לוֹ חֵלֶק לְעוֹלָם הַבָּא (בָּבָא מְצִיעָא נט.); אִיךְ וִויל נִישְׁט אִין יְשִׁיבָה דִי זַאכְן.
אוֹיךְ וִויל אִיךְ אַז אַלֶע בָּחוּרִים זָאלְן קוּמֶען אִין יְשִׁיבָה מִיט אַ הוּט אוּן רֶעקְל, אִין יְשִׁיבָה דַארְף מֶען נִישְׁט גִיין אַ גַאנְצְן טָאג אַזוֹי, נָאר בַּיים דַאוֶוענֶען מוּז מֶען גִיין אָנְגֶעטוּן, און אוֹיךְ בַּיים קוּמֶען אוּן גִיין.
אִיךְ דַארְף מְקַצֵר זַיין, אִיךְ וֶועל נָאךְ דֶעדְן מִיט דִיר מֶער בַּאֲרִיכוּת, וַוייל יֶעצְט בִּין אִיךְ נָאךְ אָפְּגֶעמַאטֶערְט פוּן דִי נְסִיעָה אַהֵיים פוּן דֶבִּינְ'ס רֹאשׁ הַשָּׁשָׁנָה. גֶעכְטְן הָאט גֶעהֵייסְן אַז עֶס וֶועט זַיין אַ שִׁיעוּר, אָבֶּער אִיךְ הָאבּ נִישְׁט גֶעהַאט דִי כּוֹחוֹת, אִיךְ דַארְף קוּמֶען צוּ דִי כּוֹחוֹת.
דֶער אֵייגֶערְשְׁטֶער זָאל הֶעלְפְן זָאלְסְט הָאבְּן הַצְלָחָה אִין אַלֶע עִנְיָנִים.
אַ גְמַר חֲתִימָה טוֹבָה.