מפי עוללים

הַשְׁגָּחָה פְּרָטִית מַעֲשִׂיּוֹת, דֶערְצֵיילְט אוֹיפְן הַאטְלֵיין דּוּרְךְ דִי קִינְדֶער

תְּפִילִין בַּיי דֶער סְטַאנְצְיֶע

עֲקִיבָא יוֹסֵף וַוייסְפִישׁ פֿון בֵּית שֶׁמֶשׁ דֶערְצֵיילְט:

מִירוֹן. דֶער חָלוֹם פֿון יֶעדְן אִידִישׁ קִינְד צוּ וַויילְן דָארְט אַ שַׁבָּת.

אוֹיךְ מִיר זֶענֶען אִין אַ גֶעלֶעגְנְהֵייט אַרוֹיפְגֶעפָארְן קַיין מִירוֹן אוּן גֶעפְּרַאוֶועט אַ וואוּנְדֶערְלִיכֶע שַׁבָּת. אוּן אַז מֶען אִיז שׁוֹין גֶעפָארְן אַזוֹי וַוייט, הָאבְן מִיר צוּגֶעצָאלְט אַ בִּיסְל גֶעלְט אוֹיף דִי דִירָה'לֶע אוּן שׁוֹין גֶעקוּמֶען פֿון דָאנֶערְשְׁטָאג. פַארְשְׁטֵייט זִיךְ מִיטְבְּרֶענְגְנְדִיג אוּנְזֶערֶע תְּפִילִין צוּ דַאוֶוענֶען שַׁחֲרִית בַּיי ר' שִׁמְעוֹן.

מוֹצָאֵי שַׁבָּת, הָאט יֶעדֶער פֿון דִי פַאמִילְיֶע מִיטְגְלִידֶער צוּגֶעלֵייגְט אַ הַאנְט אוּן אַרוֹיסְגֶעהָאלְפְן מִיטְן שְׁלֶעפְּן דִי פֶּעק אוּן טֶעפְּלֶעךְ צוּ דִי סְטַאנְצְיֶע וָואס אִיז אִינְדְרוֹיסְן פֿון דָארְף מִירוֹן, דָארְט קוּמֶען דִי בָּאסֶעס.

אוּן דֶער בָּאס קוּמְט אָן. אַ גֶערַאנְגְל פֿון מֶענְטְשְׁן שְׁטוּפְן זִיךְ בַּיי דִי טִירְן. אוּן אוּנְזֶער פַאמִילְיֶע קֶען נִישְׁט אַרוֹיפְגֵיין. נִישְׁטָא קֵיין פְּלַאץ.

"עֶס קוּמֶען שׁוֹין אוּנְטֶער נָאךְ בָּאסֶעס," הָאט דֶער דְרַאיוֶוער אַרוֹיסְגֶעשְׁרִיגְן אוּן גֶעדְרֵייט דִי רֶעדֶער.

מִיר הָאבְן זִיךְ אָפְּגֶערוּקְט אוּן גֶעלָאזְט דֶעם בָּאס אַוֶועקְפָארְן. וֶוען פְּלוּצְלִינְג רוּפְט אַרַיין דֶער בַּאלֶעבָּאס פֿון דִי דִירָה וואוּ מִיר זֶענֶען אֵיינְגֶעשְׁטַאנֶען צוּ מַיין טַאטְן, אוּן מֶעלְדֶעט אִים אִיבֶּער דִי תְּפִילִין וֶועלְכֶע מִיר הָאבְן דָארְט אִיבֶּערְגֶעלָאזְט...

בָּרוּךְ ה'! מִיר הָאבְן עֶסְפִּיעֶט עֶס צוּ לוֹיפְן נֶעמֶען אוּן נָאר דֶערְנָאךְ אַרוֹיפְגֶעשְׁטִיגְן רוּאִיג אוֹיף אַ בָּאס וָואס הָאט אוּנְז גֶענוּמֶען מִיט אַלֶע פֶּעק, אִינְאֵיינֶעם מִיט דִי תְּפִילִין, אַהֵיים.

עֶס אִיז גֶעוֶוען אַזוֹי קְלָאר אוֹיף וָואס עֶס אִיז גֶעוֶוען דֶער אָפְּהַאלְט מִיטְן עֶרְשְׁטְן בָּאס, אַזְשְׁ אַ גַאנְצֶע לַאנְגֶע וֶועג אִיז אוּנְז פַארְבְּלִיבְן צוּ לוֹיבְן אוּן דַאנְקֶען אוֹיף דִי וואוּנְדֶערְלִיכֶע הַשְׁגָּחָה פְּרָטִית.

נִישְׁט סְתַּם אַ וֶועג

אַבְרָהָם זִילְבֶּערְשְׁלַאג פֿון מוֹדִיעִין עִילִית דֶערְצֵיילְט:

יֶעדְן טָאג גֵיי אִיךְ אַ בַּאשְׁטִימְטֶע וֶועג אִין חֵדֶר. דֶער וֶועג אִיז מִיר בַּאקַאנְט אוּן נִישְׁט אִינְטֶערֶעסַאנְט.

אֵיין טָאג הָאב אִיךְ בַּאשְׁטֶעטִיגְט אַז הַיינְט גֵיי אִיךְ הֲנָאָה הָאבְן פֿון דֶעם וֶועג. וִוי אַזוֹי? גַאנְץ אַיינְפַאךְ. אִיךְ גֵיי גֵיין דּוּרְךְ אַ לֶענְגֶערֶע וֶועג אוּן זֶען אַן אַנְדֶער פַּאנָארַאמֶע.

אַזוֹי שְׁפַּאצִירְנְדִיג אוּן בַּאטְרַאכְטְן דִי הָארִיזָאנְט קְלַאפ אִיךְ זִיךְ אָן אִין עֶפֶּעס. עֶי! וָואס אִיז דָאס? אַ בִּיכֶעלֶע פֿון וַואקְסִינֶען! אִיךְ קוּק אוֹיפְן נָאמֶען. עֶס אִיז מִיר בַּאקַאנְט. עֶס אִיז פֿון אַ אִינְגְל פֿון מַיין חֵדֶר! אוּן פוּנְקְט הַיינְט טַאקֶע הָאט מֶען גֶעדַארְפְט בְּרֶענְגֶען אִין חֵדֶר דִי וַואקְסִין בִּיכְל. וַוייל יֶעדֶער גֵייט בַּאקוּמֶען אַ גֶעוִויסֶע וַואקְסִין אִין חֵדֶר!

אִיךְ הָאב עֶס גֶעבְּרֶענְגְט אִין חֵדֶר אוּן אִיבֶּערְגֶעגֶעבְּן דֶעם אִינְגְל וֶועלְכֶער הָאט זִיךְ שְׁטַארְק גֶעפְרֵייט דֶערְמִיט. "אָן דֶעם וָואלְט אִיךְ נִישְׁט גֶעקֶענְט בַּאקוּמֶען דִי וַואקְסִין," אִיז עֶר גֶעוֶוען אִיבֶּערַאשְׁט פֿון דִי הַשְׁגָּחָה פְּרָטִית וָואס הָאט אִים עֶס אַהֶער גֶעבְּרֶענְגְט בִּיזְן קְלַאס.