Skip to content
הבדלה בליצן - אידיש

אפיסעס מעסעדזשעס

  • Sukkos
  • 5787
  • Yiddish
View printout

זיין פראדוקטיוו א גאנצן טאג

אויף די שאלה פון אן ארבעטער אין אן אקאונטינג אפיס וואס האט אסאך איבריג צייט און דאס ברענגט אים צו שלעכטע פלעצער:

איך האלט אז אויב מ'נעמט אוועק די מעגליכקייט צו גיין צו אזעלכע סייטס, וועט יעדער מענטש אליין טרעפן וועגן וויאזוי אנצופילן זיין איבריגע צייט. כל זמן מען האט די ברירה פון אנליין אינטערטעינמענט, בלייבט דער מוח פארמאכט. אבער אז מען וועט האבן א "ווייט-ליסט" (whitelist אדער א שטארקע פילטער וואס בלאקירט אלע סייטס וואס זענען נישט פאר ביזנעס, אדער א מאניטערינג וואו אנדערע האלטן מיט וואס מ'טוט, וועט מען שוין אליין אויפקומען מיט פראדוקטיווע זאכן צו טון.

איך, למשל, האב אין די זייטיגע צייטן צוזאמגעשטעלט א ליסטע פון געסט פאר א שמחה, אדער אויסגעשטעלט א קלארן משפחה בודזשעט אויף עקסעל (Excel).

אויב מען האט נאכאלץ ליידיגע צייט, וואלט איך גע'עצה'ט צו שמועסן מיט'ן בעל הבית. אדער זאל ער טרעפן נאך ארבעט, אדער זאל ער אראפנעמען שעות אין די שטילע צייטן אן שניידן פון די וועידזש. איך פערזענליך האב געהאט אזא סארט אפמאך מיט מיין בעל הבית און עס האט זייער גוט געארבעט; וויבאלד דער בעל הבית דארף דיר האבן אינעם ביזי סעזאן, קומט זיך דיר באצאלט פארן זיין אויף סטענד-ביי.

אויב דער בעה"ב וויל אז מען זאל זיצן אין אפיס נאר כדי צו ענטפערן א פאון קאל דא און דארט, דארף מען אים מסביר זיין אז ס'איז נישט פראקטיש. מען קען פארווערדן די קאלס צום סעלפאן, אדער אויפנעמען קאסטומער סערוויס ארבעטער פון אנדערע לענדער. אויב דער בעה"ב וויל בשום אופן נישט טרעפן א לעזונג, איז אפשר צייט צו זוכן א פרישע דזשאב.

פארבעסערן דעם פילטער

איך האב געהאט פארשידענע פראבלעמען מיט מיין פילטער, און עס האבן זיך כסדר געמאכט נסיונות פון אלע מינים. א חשוב'ער רב האט מיר דעמאלטס מייעץ געווען צו לערנען יעדן טאג אין א ספר אויף שמירת עינים, און ס'האט מיר שטארק ארויסגעהאלפן. אבער באמת איז די בעסטע עצה צו מאכן דעם פילטער אזוי שטארק, אז ס'זאל שוין נישט זיין קיין טיר וואו די נסיונות זאלן קענען אריינקומען. ווען מ'ארבעט פאר א צווייטן איז עס אביסל א שווערערע זאך, אבער מען דארף פרובירן.

אויב מען זעט אז עס איז דא איין געוויסע סייט וואס איז זייער אדיקטיוו (אפילו אויב עס האט נישט קיין ערנסטע פראבלעמען), איז כדאי צו ריקוועסטן די פילטער קאמפאני אז זיי זאלן בלאקירן די סייט אדער די גאנצע קאטעגאריע.

איבער גוגל טשעטס

שלום עליכם און א גרויסן יישר כח פאר אייערע "הבדלה בליצן". ווען איך האב געזען אייער ארטיקל איבער "גוגל טשעטס", האב איך געפילט אז איך מוז מיטטיילן מיין ערפארונג.

איך האב אנגעהויבן ארבעטן דעם זומער נאך די סקול יארן אלס א תמימות'דיגע בת ישראל. אזוי ווי איך האב געהאט צוטריט צו מיין פריוואטע אימעיל, האב איך אנגעהויבן ארומקוקן. איין טאג האט א חבר'טע מיר פארגעשלאגן צו קוקן אין א "גוגל טשעט" גרופע וואו מען שיקט ארום בילדער פון שידוכים, און איך האב געבעטן זי זאל מיר צולייגן.

איינמאל איך בין אריין, האב איך זיך געטראפן 'לעבן' אין דעם טשעט. די גרופע האט געהאט איבער דריי טויזנט מעמבערס. ווען איינער האט געבעטן אן אינווייט צו א צווייטע גרופע, האבן הונדערטער אנדערע אויך געבעטן. פשוט אויס נייגעריגקייט האב איך אויך געבעטן מען זאל מיך צולייגן.

אזוי איז עס געגאנגען ווייטער. איינע פון די טשעטס איז געווען ממש שרעקליך, האב איך מיך שנעל אראפגעסיינט פון 'אלע' טשעטס. שפעטער האב איך חרטה געהאט און געבעטן מען זאל מיר צוריקנעמען צו די שידוכים טשעט. למעשה האט זיך עס איבערגע'חזר'ט; איך האב אפילו געעפנט א פרישע אימעיל ספעציעל פאר דעם, און באלד געווען א חלק פון 19 טשעטס מיט טויזנטער מעמבערס.

טשעט אויך מיט מענער רח"ל.

איין טאג האט א פרעמדע אימעיל אדרעס מיר געבעטן אים צו צולייגן צו מיינע טשעטס, און איך האב עס געטון. ווען איך האב צוריקגעפרעגט אין וועלכע טשעטס ער איז, האט ער מיך צוגעלייגט צו נאך צוויי גרופעס. פלוצלינג האב איך באמערקט אז רוב נעמען דארט זענען פון מענער. דאס איז געווען א שאק.

איך בין געווען שאקירט. איך האב געוויסט איך דארף אראפגיין, אבער איך האב נישט געהאט די כוחות. איין טאג האב איך זיך אנגעגארטלט מיט שטארקייט און אינגאנצן אויסגעמעקט יענעם אימעיל אדרעס. איך ווייס נישט אויב איך וועל אמאל קענען צוריקגיין צו מיין אלטע תמימות. ביטע זייט ממשיך מיט די "גוגל טשעט" אויפוואכונג, עס וואלט געווען וויכטיג צו מאכן אוועירנעס פאר די יונגע מיידלעך וואס גייען יעצט אריין ארבעטן אין אפיסעס.

זיך רוקן העכער אין די קאמפאני

נאך א ענטפער פון א ליינער אויף די אויבנדערמאנטע שאלה :

איך פארשטיי דעם מצב הונדערט פראצענט. איך האב אמאל געארבעט אין א פלאץ וואס איז געווען "סיזענאל" – אמאל ביזי און אמאל ממש אן קיין ארבעט. אנפאנג האב איך מיך געפריידט און אנגעהויבן טון שאפינג, אבער איך האב שנעל איינגעזען אז ס'איז נישטא קיין סיפוק אין זיצן און שפילן דעם גאנצן טאג.

איך האב געפרעגט מיין בעה"ב וויאזוי איך קען אויסנוצן די שעות פאר עפעס וואס וועט ברענגען א תועלת פאר די פירמע. דאס האט מיר סיי געגעבן וואס צו טון, און מיר אויך ארויפגעברענגט העכער אין די פירמע. אויב מען האט א רצון אויפצוטון, קען מען אריינטראכטן: "וויאזוי קען איך העלפן די פירמע וואקסן און זיין מער ארגאניזירט?"

דאס איז אבער נאר אויב מען זוכט סיפוק; אויב מען האט נישט קיין געדולד צו ארבעטן שווערער, דעמאלטס איז בעסער זיך צו האלטן ווייט פונעם קאמפיוטער, ווייל ליידיגקייט ברענגט אלע סארט פראבלעמען.

More in this printout

View the whole printout