מַיין גְרוֹיסֶער בְּרוּדֶער הָאט חֲתוּנָה גֶעהַאט פַאר אַסַאךְ יָארְן צוּרִיק אוּן עֶר וואוֹינְט אִין אֶרֶץ יִשְׂרָאֵל. עֶר הָאט שׁוֹין נִישְׁט בַּאזוּכְט בַּיי אוּנְז אַסַאךְ יָארְן, אוּן פַאר אַ צַייט צוּרִיק הָאט עֶר אוּנְז גֶעלָאזְט וִויסְן אַז עֶר גִייט קוּמֶען צוּ אוּנְז פַאר אַ בַּאזוּךְ. אִיךְ בִּין גֶעוָוארְן זֵייעֶר אִיבֶּערְרַאשְׁט, כְ'הָאבּ שׁוֹין גֶעוָוארְט צוּ זֶען מַיינֶע פְּלוּמֶענִיקֶעס וֶועמֶען כְ'הָאבּ נָאךְ קֵיינְמָאל נִישְׁט גֶעזֶען, אוֹיסֶער אִין בִּילְדֶער. דֶעם פְרִיעֶרְדִיגְן מָאל וָואס עֶר אִיז גֶעקוּמֶען אַ בַּאזוּךְ הָאט עֶר אוּנְז גֶעבְּרֶענְגְט סְטֶעצִיעֶלֶע מַתָּנוֹת פַאר מִיר אוּן פַאר אַלֶע מַיינֶע בְּרִידֶער אוּן שְׁוֶועסְטֶער, אוֹיךְ יֶענְט הָאבּ אִיךְ שׁוֹין גֶעוָוארְט צוּ זֶען וֶועלְכֶע מַתָּנָה עֶר גִייט מִיר בְּרֶענְגֶען.
וֶוען עֶר אִיז אָנְגֶעקוּמֶען הָאט עֶר מִיר גֶעזָאגְט: "פַאר דִיר הָאבּ אִיךְ גֶעקוֹיפְט אַ עֶם. פִּי. טְרִי. פְּלֶעיֶער, וַוייל כְ'הָאבּ זִיךְ נָאכְגֶעפְרֶעגְט אִין דִי מִשְׁפָּחָה אוּן יֶעדֶער הָאט מִיר גֶעזָאגְט אַז דוּ הָאסְט זֵייעֶר לִיבּ צוּ הֶערְן שִׁיעוּרִים אוּן נִיגוּנִים אוֹיף אַזַא פְּלֶעיֶער." אוּן עֶר אִיז טַאקֶע גֶערֶעכְט גֶעוֶוען מִיט דֶעם. עֶר הָאט אַרוֹיסְגֶענוּמֶען פוּן זַיין דֶענְצְל אַ שָׁאכְטְל אִין וֶועלְכֶע סְ'אִיז גֶעלֶעגְן אַ סְטֶעצִיעֶל טֵייעֶרֶע פְּלֶעיֶער, אָבֶּער פְּלוּצְלִינְג הָאבּ אִיךְ גֶעזֶען אַז דֶער פְּלֶעיֶער הָאט נִישְׁט קֵיין הֶכְשֵׁר.
סְ'אִיז מִיר גֶעוֶוען זֵייעֶר שְׁוֶוער זִיךְ צוּ שְׁטַארְקְן אוֹיף דֶעם נִסָיוֹן. אִיךְ בַּאקוּם שׁוֹין אֵיין מָאל אַזָא טֵייעֶרֶע פְּלֶעיֶער אוּן אִיךְ וֶועל מְוַתֵּר זַיין דֶערוֹיף?! כְ'הָאבּ זִיךְ פְּרוּבִּירְט שְׁטַארְקְן מִיט אַ שִׂמְחָה שֶׁל מִצְוָה, אַזוֹי וִוי אִין אַלֶע מַעֲשִׂיוֹת וָואס אִיךְ לֵיין כְּסֵדֶר אִין דֶעם גִלְיוֹן הַשְׁמְעִינִי אֶת קוֹלֵךְ', סְ'אִיז מִיר גֶעוֶוען זֵייעֶר זֵייעֶר שְׁוֶוער, אָבֶּער כְ'הָאבּ עֶס בּ"ה בַּאוִויזְן.
נָאךְ עֶטְלִיכֶע טֶעג הָאט מִיר מַיין בְּרוּדֶער גֶעפְרֶעגְט: "נוּ, וִוי אַזוֹי אִיז דֶער פְּלֶעיֶער?" סְ'אִיז מִיר גֶעוֶוען זֵייעֶר אוּמְאַנְגֶענֶעם, כְ'הָאבּ אִים נִישְׁט גֶעוָואלְט גֶעבּן אַ שְׁלֶעכְטֶע גֶעפִיל. אָבֶּער מַיין בְּרוּדֶער הָאט מִיר נִישְׁט גֶעלָאזְט זִיךְ אַרוֹיסְדְרַייעֶן. בְּלֵית בְּרֵירָה הָאבּ אִיךְ אִים דֶערְצֵיילְט אַז אִיךְ הָאבּ עֶס דֶערְוַוייל נָאכְנִישְׁט גֶעעֶפְנְט, וַוייל סְ'הָאט נִישְׁט קֵיין הֶכְשֵׁר.
מַיין בְּרוּדֶער אִיז גֶעוָוארְן אַזוֹי אִיבֶּערְרֵאשְׁט פוּן מַיין שְׁטַארְקֵייט, עֶר הָאט גְלַייךְ אַרוֹיסְגֶענוּמֶען זַיין בֶּערְזְל אוּן מִיר גֶעגֶעבּן זַיין קְרֶעדִיט קָארְטְל, אוּן מִיר גֶעזָאגְט: "גֵיי יֶענְט אִין גֶעשֶׁעפְט אוּן קוֹיף דִי בֶּעסְטֶע עֶם. פִּי. טְרִי. פְּלֶעיֶער וָואס אִיז דָא מִיט דֶעם בֶּעסְטְן הֶכְשֵׁר!"
כְ'הָאבּ גֶעזֶען מִיט דִי אוֹיגְן אַז פוּן בֵּייִשְׁטֵיין אַ נִסָיוֹן דֶערְלֵייגְט מֶען נִישְׁט. (אַרִי וו.)